काठमाडौं (हाम्रो खेलकुद)-११औं संस्करणको राष्ट्रपति रनिङ शिल्डमा प्रदेश ५ च्याम्पियन बनेको छ । मंगलबार सम्पन्न भएको रनिङशिल्डमा प्रदेश ५ ले २० स्वर्ण, २० रजत र १० कास्य जितेर च्याम्पियन बनेको हो  ।

१ नम्वर प्रदेश १३ स्वर्ण, १३ रजत र २० कास्य जितेर दोस्रो भयो । १२ स्वर्ण, ८ रजत र १३ कास्यसहित सुदूरपश्चिम प्रदेशले तेस्रो स्थान हात पा¥यो ।
यो संस्करणमा सात प्रदेशमध्ये चार प्रदेशले मात्रै सहभागिता जनाएको थियो । राष्ट्रिय खेलकुद परिषद् (राखेप) को आयोजनामा गत आइतबारदेखि सुरु भएको केन्द्रीयस्तरको यो प्रतियोगितामा विभिन्न ६ खेलमा प्रतिस्पर्धा भएको थियो । जसमा एथलेटिक्स, भलिबल, कराते, तेक्वान्दो, उसु र कबड्डी रहेको थियो ।

एथलेटिक्समा ८८ खेलाडीले २६ स्पर्धामा प्रतिस्पर्धा गरेका थिए । भलिबल र कबड्डीमा चारै प्रदेशबाट छात्र÷छात्रामा तथा करातेमा ४८ खेलाडीले ८ स्पर्धामा सहभागिता जनाएका थिए । तेक्वान्दो र उसुमा समान ४८–४८ खेलाडीले समान ६–६ स्वर्णका लागि भिडेका थिए ।

व्यक्तिगत स्पर्धामा शीर्ष तीन स्थान हात पार्ने खेलाडीहरुले क्रमशः ५ हजार, ४ हजार र ३ हजार नगद पुरस्कार पाए । टिममा पहिलोदेखि तेश्रो हुने खेलाडीलाई क्रमशः २ हजार ५ सय, २ हजार र १ हजार ५ सय नगद पुरस्कार हात पा¥यो । छात्रको ४ गुणा ४ सय मिटर रिलेमा प्रदेश ५ का सिमान पाण्डे, लेखनाथ महर, बेदबहादुर ओली र श्रवन केवतले तथा छात्राको ४ गुणा ४ सय मिटर रिलेमा प्रदेश ५ का अरुणा रिजाल, पुर्णिमा खड्का, पूजा चौधरी र करुणा रिजालले नयाँ जुनियर कीर्तिमान बनाएबापत् थप १० हजार रुपैया पाए ।

सटपुटमा प्रदेश ५ की संगीता अधिकारीले तथा ४ सय मिटर दौडमा प्रदेश ५ कै अरुणा रिजालले पनि नयाँ जुनियर कीर्तिमान बनाएबापत १० हजार जितिन् ।
विजयी खेलाडीहरुलाई राखेपका उपाध्यक्ष पिताम्वर तिम्सिना, प्रदेश ५ का खेलकुद विकास समितिका अध्यक्ष भीम ओली लगायतले पुरस्कृत गरे ।