काठमाडौं (हाम्रो खेलकुद) – थापाथली चेस पार्क र गजुरमुखी चेस क्लब इलाम तुल्सीलाल अमात्यस्मृति पाँचौं राष्ट्रिय क्लब टिम चेस च्याम्पियनसिपको उपाधिका लागि भिड्ने भएका छन् ।

सेमिफाइनलमा शुक्रबार थापाथलीले लुम्बिनी इभेन्ट म्यानेजमेन्ट रुकुमलाई ४—० ले र गजुरमुखीले गोल्डेनगेटलाई २.५—१.५ अंकले हराउँदै फाइनलमा एक अर्कासँगको भेट पक्का गरेका हुन् । एकतर्फी सेमिफाइनलमा थापाथलीका आशिष फुयालले मिलन लामा, रुपेश जैसवालले विवेक श्रेष्ठ, क्षितिज भण्डारीले सुश्रुत दाहाल र सुमित पन्तले मिलन रोकालाई हराए ।

अर्को खेलमा गजुरमुखीका मनिष हमालले भूपेन्द्र निरौलालाई र प्रकाश नेपालले मदनकृष्ण कायस्थलाई हराए । गोल्डेनगेटका केशव श्रेष्ठले रिजेन्द्र राजभण्डारीलाई हराए पनि सुरवीर लामा र कृष्ण थापाबीच बराबरी हुँदा गजुुरमुखीे अन्तिम दुईमा पुगेको हो ।

नेपाल बुद्धिचाल संघ र ललितपुर स्पोटस् क्लबको संयुक्त आयोजनामा च्यासलस्थित तुल्सीलालस्मृति प्रतिष्ठानमा जारी प्रतियोगिताको सेमिफाइनलमा पराजित टोलीले तेस्रो स्थानमा प्रतिस्पर्धा गर्नेछन् । प्रतियोगिताको विजेता टोलीले १ लाख ७५ हजार, दोस्रो हुनेटले १ लाख, तेस्रो हुनले ६० र चौथो टोलीले ४० हजार रुपैयाँ प्राप्त गर्नेछ ।