पोखरा (हाम्रो खेलकुद)– नेपाल पुलिस क्लबले पहिलो पटक तीज महोत्सव राष्ट्रिय महिला भलिबल प्रतियोगिताको च्याम्पियन बन्दा व्यक्तिगत पुरस्कारमा पनि दबदबा राखेको छ । प्रतियोगिताका ७ व्यक्तिगत पुरस्कार मध्यये ४ पुरस्कार पुलिसका खेलाडीले जिते ।

तीन दिने प्रतियोगितामा पुलिसकी मनीषा चौधरी सर्वोत्कृष्ट खेलाडीबाट पुरस्कृत भइन् । उनले ५ हजार रुपैयाँ हात पारिन् । त्यस्तै पुलिसकी सुशिला थापा उत्कृष्ट सेटर, पुष्पा चौधरी उत्कृष्ट ब्लकर र कोपिला उप्रेती उत्कृष्ट स्पाइकर चुनिइन् ।

त्यस्तै तेस्रो भएको गण्डकीकी रश्मिता दुरा उत्कृष्ट लिबेरो र पवित्रा सेन्चुरी उत्कृष्ट क्विकर घोषित भइन् । फाइनलमा पराजित न्यु डायमण्डकी झरना श्रेष्ठ उत्कृष्ट सर्भर छानिइन् । सबै विधागत विजेताले जनही ३ हजार रुपैयाँ प्राप्त गरे ।

पोखराको लामाचौरमा सोमबार होवाङ्जी न्यू डायमण्ड एकेडेमीलाई ३–० ले हराउँदै विभागिय टोली पुलिस तीज महोत्सव महिला भलिबलको च्याम्पियन बनेको हो । महत्त्वपूर्ण खेलाडी राष्ट्रिय टोलीको प्रशिक्षणमा रहेपछि दुई विभागिय टोली एपिएफ क्लब र त्रिभुवन आर्मी क्लबले प्रतियोगितामा भाग लिएका थिएनन् ।

अघिल्लो दिन समूह चरणमा हराउनका लागि केहि संघर्ष गरेको पुलिसले फाइनलमा भने सहज जित हासिल गरेको थियो । पोखराको लामाचौरमा पुलिसले न्यु डायमण्डलाई २५–१६, २५–१४ र २५–२० को सेटमा हराएको थियो । विजता पुलिसले उपाधिसहित १ लाख रुपैयाँ र न्यु डायमण्डले ६५ हजार रुपैयाँ प्राप्त गरेको थियो ।