काठमाडौं (हाम्रो खेलकुद) – नमुना बौद्ध मास्टर्स बुद्धिचाल प्रतियोगिताको छैटौं चरणको समाप्तीमा फिडेमास्टर रुपेश जैसवाल, नेपाल च्याम्पियन पुरुषोत्तम चौलाई र डायनामिक एकेडेमीका क्यान्डिडेट मास्कर भुपेन्द्र निरौला संयुक्त रुपमा अगाडि रहेका छन् ।

पाँचौ राउण्ड सम्म एकल अग्रता लिएका रुपेश छैटौ राउण्डमा पूर्व नेपाल च्याम्पियन सूरवीर लामासँग बराबरीमा रोेकिए । रुपेशसँगै पुरुषोत्तम र चौलागाइ र भुपेन्द्रको समान ५ अंक छ । सुरवीरको ४ दशमलव ५ अंक छ ।
रुपेशसँगै पुरुषोत्तम र चौलागाइ र भुपेन्द्रको समान ५ अंक छ । दोश्रो बोर्डमा कालोगोटीबाट खेलेका पुरुषोत्तमले आशिष फुयाललाई हराए ।

तेश्रो बोर्डमा सेतोगोटीबाट खेलेका भूपेन्द्रले गजुरमुखी चेस क्लबका राजन सुवेदीलाई माथ दिए । पुन्यमान कर्माचार्यमाथी जित निकाल्दै क्यान्डिडेट मास्टर क्षितिज भण्डारीले सातौ राउण्डमा भुपेन्द्र निरौलासँगको भेट पक्का गरे । जितसँगै क्षितिजको ४ दशमलव ५ अंक भएको छ ।

पूर्व नेपाल च्याम्पियनद्धय नविन तण्डुकार र बद्रीलाल नेपालीले पनि शुक्रबार जित निकाले । नविनले क्यान्डिडेट मास्टर सजिन महर्जनलाई र बद्रीलाल नेपालीले जनार्दन श्रेष्ठलाई हराए । थापाथली चेस पार्कका सुमित पन्तले गोल्डेनगेट कलेजका निकेन कुशाथा माथी जित हातपारे । जितसँगै नविन ,बद्रीलाल र सुमिनको समान ४ दशमलव ५ अंक भएको छ । छैटौ राउण्डको अन्य खेलमा जित निकाल्दै फिडे माष्टर मनीष हमाल, राजेन्द्र बज्रचार्य, शुशिल चौधरी, गणेशमान दुवाल र प्रकाश नेपालको समान ४ अंक छ ।

त्यस्तै बराबरी खेलेका राजन पुरी र सुदीप तामाङको पनि समान ४ अंक छ । प्रतियोगितामा पूर्व नेपाल च्याम्पियन तथा क्यान्डिडेटमास्टर मदनकृष्ण कायस्थको ३ दशमलव ५ तथा फिडेमास्टर रिजेन्द्र राजभण्डारी, क्यान्डिडेटमास्टर भगवती प्रसाद शर्मा, सुमन लामा, राकेश रौनियार, युवराज पौडेल, पुर्णराज खड्का, सुमन राई र मणीराज डाँगीको समान ३ अंक छ ।
नमुना बौद्ध चेस क्लबको आयोजना तथा मार्बल टेक्नोप्लाष्टको प्रायोजनमा जारी प्रतियोगिता अन्र्तगत शनिबार सातौं र आठौं राउण्डका खेल हुनेछन् ।