काठमाडौं (हाम्रो खेलकुद) – विशेष प्रशिक्षण र अभ्यास खेलका लागि थाइल्यान्डमा रहेको नेपाली राष्ट्रिय महिला भलिबल टिमले अभ्यास खेलमा लगातार दोस्रो जित निकालेको छ ।

नेपालले दोस्रो अभ्यास खेलमा थाइल्यान्डको बैंकक युनिभर्सिटीमाथि ३–१ को जित निकालेको हो । यसअघि नेपालले पहिलो अभ्यास खेलमा जरानसानिवोङ युलाई ३–१ को सेटमै पाजित गरेको थियो । एसियाकै उत्कृष्ट एफआइभीवी ट्रनिङ सेन्टरमा आइतबार भएको खेलमा नेपालले पहिलो सेट २५–२१ ले आफ्नो पक्षमा पारेको थियो । प्रतिस्पर्धात्मक दोस्रो सेट नेपालले २४–२६ ले गुमाएपनि त्यसपछिको दुवै सेटमा नेपाल २५–१६ र २५–१९ ले विजयी हुन सफल भयो ।

बंगलादेशमा आयोजना हुने प्रथम एभीसी एसियन सेन्ट्रल जोन भलिबल च्याम्पयनसिप नेपालमै आयोजना हुने १३औं सागको थप तयारीका लागि नेपाली टोली २२ दिने प्रशिक्षणमा लागि थाइल्यान्ड गएको हो । नेपाली टोलीले एक दिनको अन्तरमा थाइल्यानडा रहेको विभिन्न टोलीसँग अभ्यास खेल खेलिहेको छ ।

टोलीले दैनिक दुई समयमा (बिहान र साँझ) प्रशिक्षण गरिरहेको छ । त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् । सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।