काठमाडौं (हाम्रो खेलकुद)– प्रशिक्षणका लागि थाइल्यान्डमा रहेको नेपाली राष्ट्रिय महिला भलिबल टोलीले अभ्यास खेलमा पहिलो हार बेहोरेको छ । नेपाली टोलीले थाइल्यान्डको यु–२३ टिमसँग हार बेहोरेको हो ।
यसअघिका दुई अभ्यास खेलमा जित हात पारेको नेपाल थाइल्यान्डको यु–२३ टिमसँग ३–० का सोझो सेटमा पराजित भएको हो । बैंककस्थित नेपालले पहिलो सेट २५–१८ ले गुमाएको थियो । दोस्रो सेटमा नेपालले कडा टक्कर दिएपनि २६–२४ ले सेट गुमाएको थियो । तेस्रो सेटमा २५–२० ले पराजित हुन पुग्यो ।
नेपालले पहिलो अभ्यास खेलमा जरानसानिवोङ युलाई तथा दोस्रो अभ्यास खेलमा बैंकक युनिभर्सिटीलाई समान ३–१ को सेटमा पराजित गरेको थियो । बंगलादेशमा आयोजना हुने प्रथम एभीसी एसियन सेन्ट्रल जोन भलिबल च्याम्पयनसिप र स्वदेशमा आयोजना हुने १३औं दक्षिण एसियाली खेलकुद (साग) को थप तयारीका लागि नेपाली टोली २२ दिने प्रशिक्षणमा लागि थाइल्यान्ड गएको हो ।
नेपाली टोलीले एक दिनको अन्तरमा थाइल्यानडा रहेको विभिन्न टोलीसँग अभ्यास खेल खेलिहेको छ । टोलीले दैनिक दुई समयमा (बिहान र साँझ) प्रशिक्षण गरिरहेको छ । त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् ।
सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।
