काठमाडौं (हाम्रो खेलकुद) – नेपाली राष्ट्रिय महिला भलिबल टिमले बंगलादेशमा यसै साता सुरु हुने एभिसी एसियन सेन्ट्रल जोन सिनियर महिला भलिबल च्याम्पियनसपमा माल्दिभ्स पहिलो प्रतिद्वन्द्वी पाएको छ ।

आयोजक बंगलादेश भलिबल फेडेरेसेनले मंगलबार सार्वजनिक गरेको खेल तालिका अनुसार नेपालले पहिलो खेल १० नोभेम्वरमा माल्दिभ्ससँग खेल्ने भएको हो । खेल नेपाली समयअनुसार आइतबार दिउसो २ः४५ बजे हुनेछ । त्यसपछि नेपालले ११ नोभेम्वरमा अफगानिस्तान, १२ नोभेम्वरमा किर्गिस्तान र लिगको अन्तिम खेलमा १३ नोभेम्वरमा आयोजक बंगलादेशसँग खेल्नेछ ।

राउन्ड रोविन लिगको शीर्ष दुई टोलीले उपाधिका लागि नोभेम्वर १४ मा खेल्नेछ । सोही दिन तेस्रो र चौथो स्थानको लागि खेल हुनेछ । नेपाल भलिबल संघले मंगलबार मात्रै अरुणा शाहीको कप्तानीमा १२ सदस्यीय नेपाली टोली घोषणा गरेको थियो । नेपाली टोली बिहीबार त्यसतर्फ प्रस्थान गर्नेछ ।

नेपाली टोली :

अरुणा शाही (कप्तान), प्रतिभा माली, सरस्वती चौधरी, रेश्मा भण्डारी, निरुता ठगुन्ना, जानकी भण्डारी, सोफिया पुन, उषा विष्ट, सुनिता खड्का, कमला पुन, पुनम चन्द र सलिना श्रेष्ठ

अफिसियल :

जगदिश भट्ट (मुख्य प्रशिक्षक), सलिना श्रेष्ठ (प्रशिक्षक), भरत यादव (प्रशिक्षक) र रीता कोइराला (टिम व्यवस्थापक)