काठमाडौं (हाम्रो खेलकुद) – राष्ट्रिय खेल घोषणा भएसँगै व्यापक चर्चा कमाएको नेपालले यसपटक पुरुष भलिबलमा पनि पदकको अपेक्षा गरेको थियो । तर, नेपालको यो सम्भावना निकै झिनो बनेको छ । यही अवस्थामा नेपालले आज स्वर्णको दावेदार भारतसँग प्रतिस्पर्धा गर्दैछ । खेल त्रिपुरेश्वरस्थित राखेप कभर्डहलमा साँझ ५ बजेपछि सुरु हुनेछ ।

समूह चरणको पहिलो खेलमा अग्रता लिएरपनि बंगलादेशसँग ३–२ को सेटमा पराजित भएपछि नेपालको अघिल्लो चरण पुग्ने सम्भावना झिनो बनेको हो । कम्तीमा पनि पदक जित्ने सम्भावनालाई जीवितै राख्न नेपालले भारतमाथि निश्चित जितको आवश्यकता छ । सेमिफाइनल पुग्न भारतविरुद्धको खेल नेपालको लागि ‘गर या मर’ को अवस्थामा छ । पराजित भएको अवस्थामा नेपाल समूह चरणबाटै बाहिरिनेछ ।

तर, पहिलो जितसँगै सेमिफाइनल पुगिसकेको बलियो भारतविरुद्धको खेल नेपालको लागि सहज हुनेछैन । यसअघि सागकै तयारीका रहेको नेपालले भारतसँग तीन अभ्यास खेल खेलेको थियो । तीनै खेलमा पराजित भएको थियो ।

नेपालसँग शुक्रबार हुने खेल गुमाएको खण्डमा पनि भारत सेमिफाइनल पुग्नेछ । १ खेलमा भारतको ३ अंक छ । २ खेल खेलेको बंगलादेशको २ अंक र नेपालको १ अंक छ । भोलीको खेलमा नेपाल पराजित भएको खण्डमा बंगलादेश अन्तिम चारमा पुग्नेछ । आजै समूह ‘बी’ मा श्रीलंका र माल्दिभ्स राति ७ बजे भिड्नेछन् ।

भारत सागमा भलिबल समावेश भएदेखिकै दावेदार राष्ट्र हो । नेपाल भने साग पुरुष भलिबलमा पदकविहीन छ ।