काठमाडौं (हाम्रो खेलकुद) – चोट ग्रस्त राष्ट्रिय टोली एवंम् होंगान्जी न्यू डायमण्डकी भलिबल स्टार प्रतिभा मालीको बायाँ घुँडाको शल्यक्रिया गर्नुपर्ने भएको छ । आरबिबी एनभिए क्लब च्याम्पियनसिपमा शुक्रबार नेपाल एपिएफविरुद्धको फाइनलका दौरान घाइते भएकी प्रतिभा त्यस दिनदेखि त्रिपुरेश्वरस्थित ब्लु क्रस अस्पतालमा उपचार गराइरहेकी छिन् । 

सिनियर अर्थोपेडिक सर्जन डा. प्रज्वलमान श्रेष्ठको नेतृत्वमा प्रतिभाको उपचार भईरहेको छ । डा. श्रेष्ठका अनुसार प्रतिभाको घुँडामा तीन वटा मुख्य समस्या रहेका छन् । ‘यस्तोमा बाहिरबाट हेर्दा ठिकै देखिन्छ । आज एमआरआईको रिपोर्ट आएको छ । तर क्लिनिकल्ली उहाँको घुँडामा निकै प्रब्लम छ । उहाँको एसिएल इन्जुरी, मिडियल मेनिस्कस टेयर र मिडियल कोल्याट्रल इन्जुरी भएको छ,’ उनले भने, घुँडा अहिले पनि सुन्निएको छ । त्यो कम भएपछि ३/४ दिनमा हामी शल्यक्रिया गर्नेछौं ।’

डा. श्रेष्ठसँगै नी सर्जन डा.रुपेश वैद्य र अर्थोपेडिक सजर्न डा.चन्दनले प्रतिभाको उपचार गरिरहेका छन् । डा. श्रेष्ठका अनुसार पुरानै अवस्थामा खेल्नका लागि प्रतिभालाई ८ देखि ९ महिना लाग्छ सक्छ । डा. श्रेष्ठले भने, ‘हामीले योजना गरे अनुप सबै राम्रो भयो भने उहाँलाई पुरानै अवस्थामा खेल्न ८/९ महिना लाग्छ । ‘

फाइनल खेलको तेस्रो सेटमा स्कोर २२–२० को स्थितिमा रहँदा स्पाइक प्रहार गरेपछि ल्यान्डिङ नमिल्दा उनको घुँडामा चोट लागेको थियो । मैदानमा लड्ने बितिक्कै निकै पिडामा रहेपछि उनलाई स्ट्रेचरमा अस्पताल लागिएको थियो । सुरुवाती एक्सरे रिपोर्ट अनुसार उनको घुंडाको हड्डीमा कुनै समस्या देखिएको थिएन । घँडामा रगत जमेका कारण सोमबार मात्र उनको एमआरआई गिरिएको थियो ।

नेपालले कात्तिकमा एभिसी सेन्ट्रल जोनमा स्वर्ण पदक जित्दा र मंसिरमा स्वदेशमा आयोजना भएको १३ औं दक्षिण एसियाली खेलकुद (साग) मा पहिलो पटक रजत पदक जित्दा प्रतिभा टोलीकी महत्वपूर्ण खेलाडी थिइन् ।