काठमाडौं (हाम्रो खेलकुद) – स्वदेशमा आयोजना भएको १३ औं दक्षिण एसियाली खेलकुद (साग) स्वर्ण पदक विजेता अनु अधिकारीलाई उनी कार्यरत श्रृष्टी स्कुलले सम्मान गरेको छ । स्कुलले उनलाई १० हजार रुपैयाँसहित सम्मान पत्र प्रदान गरेको थियो ।
सोही अवसरमा प्रशिक्षण दिएका विधार्थीहरुको ग्रेडिङ पनि गरेको थियो । मंसिर १५ देखि २४ गते सम्म नेपालमा भएको १३ औं सागमा अनुले करातेको कुमुतेमा स्वर्ण पदक जितेकी थिइन् । यसै वर्ष जापानको टोकियोमा आयोजना हुने टोकियो ओलम्पिक २०२० को लागि अनु ओलम्पिक सोलिडारिटी कोर्समा छनोट भएकी छिन् । उनीसँगै नवीन रसाइली पनि प्रशिक्षणमा छन् । उनीहरुलाई दीपक श्रेष्ठले प्रशिक्षण दिइरहेका छन् ।
ओलम्पिक छनोटमा नवीनले ६७ केजी तौल समूहमा तथा अनुले ५५ केजीमा प्रतिस्पर्धा गर्नेछन् । यी दुई खेलाडीले फ्रान्समा आगामी मे ८ देखि १० सम्म हुने छनोट खेलमा प्रतिस्पर्धा गर्नेछन् । छनोट चरण पार गरे ओलम्पिकमा छनोट हुनेछ । छनोट नभएको अवस्थामा वाइल्ड कार्डको लागि नेपाल ओलम्पिक कमिटीबाट प्रयास भइसकेको बताइएको छ ।
