काठमाडौं (हाम्रो खेलकुद) – युवा तथा खेलकुद मन्त्रालयले राष्ट्रिय खेलकुद परिषद् (राखेप) को नयाँ सदस्य सचिवका लागि दरखास्त आव्हान गरेको छ । खेलकुद विकास ऐन २०७७ को प्रावधान अनुसार मन्त्रालयले शुक्रबार सुचना जारी गर्दै सदस्य सचिवका लागि दरखास्त आव्हान गरेको हो ।

फाइल तस्बिर : राखेपका निवर्तमान सदस्य सचिव रमेशकुमार सिलवाल र पूर्व सदस्य सचिव केशवकुमार विष्ट (दायाँ)

६ दशक लामो इतिहास बोकेको राखेपमा खुला आव्हानबाट सदस्य सचिव नियुक्त हुन लागेको यो पहिलो पटक हो । यसअघि खेलकुद मन्त्रीले सदस्य सचिव नियुक्त गर्दै आएका थिए । सदस्य सचिव सिफारिसका लागि शुक्रबार नै सिफारिस समितिले पूर्णता पाएको थियो ।

खेलकुद विकास ऐनका अनुसार मन्त्रालयका सचिव रामप्रसाद थपलिया सिफारिस समितिका संयोजक रहनेछन् । युवा तथा खेलकुद मन्त्री जगत सुनार विश्वकर्माले शुक्रबार रिम रानाभाट र इन्दिरा निरौलालाई सदस्य चयन गर्दै सिफारिस समितिलाई पूर्णता दिएका थिए । समितिको शुक्रबार नै बसेकको बैठकले कार्यविधि तयार गरेको छ ।

सिफारिस समितिका इन्दिरा निरौला, रामप्रसाद थपलिया र रिम रानाभाट

ऐनले तोकेको मापदण्ड पुरा गर्ने व्यक्तिले ७ दिन भित्रमा सदस्य सचिवका लागि आवेदन दिने सक्नेछन् । सदस्य सचिवको इच्छुक उमेदवारले कार्ययोजनासहित मन्त्रालयमा इमेलका मार्फत पेश गर्न सक्ने कार्यविधिमा उल्लेख गरिएको छ ।

कार्ययोजनाको अध्ययनपछि एक महिलासहित कम्तीमा ३ जनाको नाम समितिले सिफापिरस गर्नेछ । मन्त्रालयले मन्त्रीपरिषद्मा उमेदवारको नाम प्रस्तुत गर्ने र त्यसबाट एक जना सदस्य सचिवमा नियुक्त हुनेछन् ।

कार्यविधिमै सदस्य सचिवका लागि आवश्यक निवेदन नपरेमा वा परेका निवेदन पनि आयोग्न भएमा पुन अर्को सुचना जारी गर्न सक्नेछ । दोस्रो पटक सुचना जारी गर्दा पनि आवश्यक संख्यामा निवेदन नपरेमा वा परेका निवेदनमा योग्य नभएमा समितिले उपयुक्त व्यक्ति छनोट गरि औचित्यका आधारमा सिफारिस गर्न सक्नेछ ।

नयाँ ऐनअनुसार राखेपको सदस्यसचिवका लागि पाँचवटा मापदण्ड तोकिएको छ । जसमा नेपाली नागरिक, स्नातक उत्तीर्ण, ३० वर्ष पूरा भएको, कम्तीमा पाँच वर्ष खेलकुदको अनुभव र प्रचलित कानुनले अयोग्य नभएको हुनुपर्ने उल्लेख छ।

राष्ट्रपति विद्यादेवी भण्डारीले असार १० गते खेलकुद ऐन २०७७ प्रमाणिकरण गरेकी थिइन्। त्यसको १ हप्तापछि असार १८ गते निवर्तमान सदस्यसचिव रमेश कुमार सिलवालसहित परिषदका उपाध्यक्ष र अन्य सदस्यहरु पदमुक्त भएका थिए।