काठमाडौं (हाम्रो खेलकुद)– राष्ट्रिय खेलकुद परिषद् (राखेप) का नवनियुक्त पदाधिकारीले पदभार ग्रहण गरेको भोलीपल्ट बिहीबार राखेप बोर्डमा ६ सदस्य मनोनति भएका छन् ।

३७ सदस्यीय बोर्डका लागि युवा तथा खेलकुद मन्त्री जगतबहादुर सुनार विश्वकर्माले ६ जनालाई मनोनित गरेका हुन् । राखेप सदस्य सचिव सिफारिस समितिको सदस्य रहेका दुवै जना रिम रानाभाट र इन्दिरा निरौला सदस्य नियुक्त भएका छन् । राखेपको अध्यक्षमा मन्त्री वा राज्यमन्त्री राष्ट्रिय खेलकुद विकास ऐन २०७७ ले रहने व्यवस्था गरेको छ ।

राखेपका पूर्व अधिकृत समेत रहेको चितवन २ का रानाभाट र ओखलढुंगा तलुवा १ की निरौला खेलकुद विज्ञ, खेलकुद प्रशिक्षक, खेलकुद प्राविधिक वा एन्टि डोपिङ विज्ञ मध्येबाट मनोनित गरेको मन्त्रालयद्वारा बिहीबार जारी विज्ञप्तीमा उल्लेख छ । निरौला यसअघि पनि राखेप सदस्य थिइन् ।

त्यस्तै राष्ट्रिय खेल संघको सिफारिसमा काठमाडौं चपलीका अर्जुनबहादुर केसी, बाग्लुङ बिहु ४ का सम्पन्न श्रेष्ठ र चितवन भरतपुर १ का सुवास श्रेष्ठ तथा परम्परागत साहकिस तथा पर्यटकीय खेलक्षेत्रको प्रतिनिधित्व हुने गरि गोवन्दप्रसाद भट्टराईलाई सदस्यमा मनोनित गरिएको जनाएको छ ।

सोमबार मन्त्रीपरिषद्को बैठक शिव कोइरालालाई उपाध्यक्ष र रमेशकुमार सिलवाललाई सदस्य सचिव नियुक्त गरेको थियो । कोइराला र सिलवालले बुधबार पदभार ग्रहण गरेका थिए ।