काठमाडौं (हाम्रो खेलकुद) – नेपालका लागि पहिलो अन्तर्राष्ट्रिय पदक विजेता जीतबहादुर केसी कोरोना भाइरस कोभिड १९ संक्रमण भएको छ ।

दिसामा रगत देखिएपछि उपचारका लागि अस्पताल पुर्याउँदा पिसिआर परिक्षण गर्न भनेपछि संक्रमण भएको थाहा भएको केसीका छोरा योगेन्द्रले हाम्रो खेलकुदलाई जानकारी दिए ।

‘बुबालाई सोमबार अलि सन्चो भएन । सुरुमा बान्ता गर्नुभयो । त्यसपछि दिसामा रगत देखिएपछि बयोदा अस्पताल लग्यौं,’ छोरा योगेन्द्रले भने, ‘पिसिआर परिक्षण पछि मात्र भर्ना गर्न मिल्छ भने पछि हामीले स्टार अस्पतालमा लगेर परिक्षण गरायौं । साँझ रिपोर्ट लिन बोलाएको थियो तर पछि फोन आउँछ भनेपनि हामीलाई शंका भयो ।’

योगन्द्रले अगाडि भने, ‘हिजो टेकु अस्पतालबाट फोन आयो । पोजेटिभ आएको छ अब केहि दिनमा वडाको मान्छेहरु आउनुहुन्छ होला भन्नुभएको छ । अहिले बुबा घरमै आइसोसेलनमा हुनुहन्छ । लक्षण केहि देखिएको छैन । दिसामा रगत देखिएको त्यसको औषधी भने चलाइरहेका छौं ।’

७२ वर्षे केसीले नेपालका लागि सन् १९७३ मा फिलिपिन्समा भएको एसियन एथलेटिक्स च्याम्पियनसिपमा कास्य पद जितेका थिए । काठमाडौ महानगरपालिका १४, कंलकी राना गाँउ घर भएका केसी परिवारका साथ बस्दै आएका छन् ।

नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले केसीका बारेमा युवा तथा खेलकुद मन्त्रालय र नेपाल ओलम्पिक कमिटीलाई जानकारी दिएको बताएका छन् ।