काठमाडौं (हाम्रो खेलकुद)– देशले संविधान दिवस मनाइरहँदा नेपाली खेलाडी र खेलकुद क्षेत्रले भने अपमान महसुस गर्नुपरेको खेलाडीको अविभावक संस्था नेपाल राष्ट्रिय तथा अन्तर्राष्ट्रिय खेलाडी संघले बताएको छ ।

संविधान दिवसका दिन शनिबार राष्ट्रपतिबाट विभिन्न क्षेत्रका व्यक्तित्वहरुलाई मानपदवी, अलंकार र पदकद्वारा विभूषण घोषणा हुँदा गत वर्ष स्वदेशमा आयोजना भएको १३ औं दक्षिण एसियाली खेलकुद (साग) का पदक विजेता खेलाडीलाई वेवास्ता गरिनुलाई खेलाडीको अपमान भएको जनाएको छ ।

तीन विभाग (सेना, प्रहरी र शसस्त्र) बाट सिफारिस भएका सागका १५ जना स्वर्ण पदक विजेतासहित ओलम्पियन संगिना वैद्य, राष्ट्रिय खेलकुद परिषद् (राखेप) का सदस्य सचिव रमेशकुमार सिलवाल, राखेपका विभागिय प्रमुख कुलबहादुर थापामात्र खेल क्षेत्रबाट विभूषित भएका छन् ।

खेलकुद क्षेत्रबाटसहित मानपदवी पाउने सबैलाई बधाई दिदै संघका अध्यक्ष दीपक श्रेष्ठद्धारा शनिबार जारी विज्ञप्तीमा भनिएको छ, ‘तर देशले विभिन्न कार्यक्रममार्फत संविधान दिवस मनाईरहँदा सिंगो खेल क्षेत्र भने निराश हुनुपर्ने अवस्था श्रृजना भएको छ ।

गत वर्ष १३ औं साग आयोजना हुँदा खेलाडीले गरेको उच्च प्रदर्शनबाट नेपालले साग इतिहासमै अहिले सम्मकै ठूलो सफलता प्राप्त गरेको थियो । नेपालले १३ औं सागमा ५१ स्वर्ण, ६० रजत र ९६ कास्य पदक सहित साग इतिहासमा सर्वाधिक पदक जितेको वर्ष दिन पनि भएको छ ।’

गत वर्ष मंसिर १५ देखि २४ गते सम्म १३ औं साग काठमाडौं, पोखरा र जनकपुरमा आयोजना भएको थियो । सागको सफलतामा देशवासीले खेलाडी, प्रशिक्षकसहित सम्बन्धित सबैलाई बधाई दिएको स्मरण गर्दै खेलाडी संघले भनेको छ, ‘त्यो सफलताका लागि खेलाडी सम्मानको हकदार थिए । त्यो सम्बन्धित निकाय ध्यान दिनुपर्ने विषय थियो । खेलाडीले आफ्नो जिम्मेवारी सफलतापूर्वक पूरा गरेका थिए, तर अहिले सरकारले विभिन्न क्षेत्रका व्यक्तित्वहरुलाई मानपदवीबाट सम्मान गर्दा खेल क्षेत्रले भने अपमान महसुस गर्नुपर्ने दुःखद अवस्था सृजना भएको छ ।’

युवा तथा खेलकुद मन्त्रालयको निर्देशन भन्दै राखेपले १३ औं सागका स्वर्ण पदक विजेता यहि मानपदवीका लागि भन्दै फारम भर्न लगाइएको प्रसंग उठाउँदै संघले आफ्नो विज्ञप्तीमा भनेको छ, ‘पदक विजेता हरेक खेलाडी मानपदवीको हकदार हुन् । त्यसका वावजुद पनि स्वर्ण पदक विजेता खेलाडीले फारम भरेर राखेपलाई बुझाएपनि आज सुची सर्वाजनिक हुँदा विभागले सिफारिस गरेका बाहेक कुनै पनि खेलाडी त्यसमा मानपदवीको सुचीमा समावेश नहुनु अत्यन्तै दुःखद पक्ष हो । यसले खेलाडी र खेल क्षेत्रलाई हेर्ने सरकारको दृष्टीकोण फेरि एक पटक उजागर भएको छ ।’

संघले सरकारलाई सम्मान दिन सकिन्न भने खेलाडीलाई अपमान गर्ने अधिकार नभएकोमा जोड दिएको छ । यसलाई खेलाडी संघले गम्भिरतापूर्वक लिएको यहाँ उल्लेख भनेको छ, ‘आजको दिन खेल क्षेत्रले अपमान महसुस गरेको छ ।’