काठमाडौं (हाम्रो खेलकुद)– कोरोना महामारीका कारण झन्डै आठ महिनायता ठप्प रहेको खेल गतिविधि सञ्चालन गर्न सरकारले अनुमति दिएको छ ।

मन्त्रीपरिषदको गत सोमबारको बैठकले अनुसार स्वास्थ्य तथा सुरक्षाका मापदण्डहरु पालना हुने गरी राष्ट्रिय तथा अन्र्तराष्ट्रिय सहभागिताका लागि प्रशिक्षण लगायतका तयारीका लागि स्वीकृति प्रदान गर्ने निर्णय गरेको हो ।

युवा तथा खेलकुदमन्त्री जगतबहादुर विश्वकर्माका अनुसार ओलम्पिक छनोटमा परेका खेलहरुको प्रशिक्षणका साथै फुटबल, क्रिकेट लगायतका खेलहरुको अन्तर्राष्ट्रिय स्तरमा सहभागिता जनाउन र मैत्रीपूर्ण खेलहरु आयोजना गर्नका लागि अब कुनै बाधा छैन । तर, सरकारले तोकेको स्वास्थ्य सम्बन्धी सुरक्षित मापदण्ड पालना भने गर्नुपर्नेछ ।

त्यस्तै कोरोना महामारीका कारण स्थगित भएका फुटबलको विभिन्न डिभिजनका खेलहरु सञ्चालनको तयारी गर्न पनि सरकारले अनुमति दिएको छ । सरकारले लकडाउन शुरु गर्नुअघि फुटबलको बी र सी डिभिजनका साथै प्रदेश लिग र महिलाको राष्ट्रिय लिग तयारी चलिरहेको थियो ।

कारोनाका कारण नेपालमा आयोजना हुन तय विश्व कप छनोट फुटबलसहित सबै खेलकुद प्रतियोगिता स्थगित भएको थियो । औपचारिक प्रशिक्षण पूर्ण रुपमा बन्द भएका थिए । त्यसमा केहि अपवादका रुपमा भने प्रशिक्षण सुरु गरिएको थियो ।

ओलम्पिक छनोटको तयारीका लागि करातेले प्रशिक्षण सुरु गरेको थियो । सरकारकै स्वीकृतिमा राष्ट्रिय फुटबल टोली प्रशिक्षण सुरु भएको थियो । अहिले फुटबल टोली दुई मैत्रीपूर्ण खेलका लागि बंगलादेशमा रहेको छ ।

प्रशिक्षण स्थगित हुँदा फिटनेसमा समस्या हुनाका साथै मानसिकतामा पनि असर भइरहेको खेलाडीले आवाज उठाइरहेका थिए । त्यस्तै सरकारले विभिन्न संघमार्फत् आयोजना हुने राष्ट्रिय प्रतियोगिताका लागि प्रशिक्षण लगायतको तयारी थाल्न पनि अनुमति दिएको छ ।