काठमाडौं (हाम्रो खेलकुद)– दुई रजत र त्यत्तिनै कास्य पदक जितेको नेपाल चीनमा भएको प्रथम उत्तरपूर्वी एसियन आइटिएफ तेक्वान्दो च्याम्पियसिपमा तेस्रो भएको छ । चिनको बेइजिङमा सम्पन्न च्याम्पियनसिपमा नेपालले अनुशासित टोली अवार्ड समेत जितेको अन्र्तराष्ट्रिय आइटिएफ तेक्वान्दो महासंघका अध्यक्ष अन्जन धमलाले जानकारी गराएको राष्ट्रिय खेलकुद परिषद् (राखेप) ले प्रेस विज्ञप्ती मार्फत उल्लेख गरेको छ ।
डिसेम्बर १५ देखि सुरु भएको च्याम्पियनसिप मंगलबार सकिएको थियो । नेपालले व्यक्तिगततर्फ एक रजत र दुई कास्य तथा टिम इभेन्ट एक रजत जितेको छ । टिम फाइटमा फाइनलमा पुगेको नेपाल उत्तर कोरियासँग पराजित भएको थियो । टिम फाइटमा पुरन केसी,सुनिल बस्नेत,नाम्गेल तामाङ,रविन मगर र शिव पाण्डे सामेल थिए ।
सुनिल र नाम्गेलले व्यक्तिगत फाइटमा समेत कास्य पदक जिते । ६५ देखि ७० केजीमा सुनिल कोरियाली खेलाडीसँग र नाम्गेलले ७० देखि ७५ केजीमा चीनका खेलाडीसँग पराजित भएका थिए । पुरन केसीले ७५देखि ८० केजी तौल समुहमा रजत पदकमा प्राप्त गरे । उनी फाइनलमा चाइनिज ताइपेका खेलाडीसँग पराजित भएका थिए ।
च्याम्पियनसिपमा १० राष्ट्रका खेलाडीको सहभागिता थियो । च्याम्पियनसिपमा उत्तर कोरिया टिम च्याम्पियन,आयोजक चीन दोस्रो र नेपाल तेस्रो भयो । च्याम्यिनसिपमा नेपाली दक्षिण एसियाली आइटिएफ तेक्वान्दो महासंघका वरिष्ठ उपाध्यक्ष समेत रहेका अन्जन धमलाको नेतृत्वमा रहेको नेपाली टोलीमा महासचिव अन्जु राउत र कोषाध्यक्ष बासु भटृ पनि रहेका छन् ।
