काठमाडौं (हाम्रो खेलकुद) – आयोजक नेपाली सेनाले प्रधान सेनापति दोस्रो राष्ट्रिय पुरुष भलिबल प्रतियोगितामा विजयी सुरुआत गरेको छ । सेनाले उद्घाटन खेलमा आइतबार अर्को विभागिय टोलीे एपिएफ लाई २५—१५, २५—१९ र २५—२० को सोझो सेटले हराएको थियो ।
अन्य खेलमा नेपाल प्रहरी, पश्चिमाञ्चल र पूर्वाञ्चलले सफलता प्राप्त गरेका छन् । नेपाल प्रहरीले मध्यमाञ्चललाई २५—१०, २५—१७ र २५—१९ ले, पश्चिमाञ्चल भलिबल टिमले सुदूरपश्चिमाञ्चललाई २५—१६, १६—२५, २६—२८ र १८—२५ ले पूर्वाञ्चलले मध्यपश्चिमाञ्चललाई १७—२५, १६—२५ र १४—२५ ले पराजित गरेको थियो ।
नेपाली सेनाले आयोजना गरेको भलिबल प्रतियोगिताको उद्घाटन प्रधान सेनापति राजेन्द्र क्षत्रीले गरेका थिए । नेपाली सेनाको सैनिक शारीरिक तालिम तथा खेलकुद केन्द्रको कभर्डहल, लगनखेलमा माघ १४ गतेसम्म सञ्चालन हुने प्रतियोगितामा सेनाको त्रिभुवन आर्मी क्लब, पुलिस, एपिएफ तथा पाँच विकास क्षेत्र गरि ८ टोलीको सहभागिता रहेको छ ।
प्रतियोगिताको विजेताले ३ लाख, दोस्रो टोलीले १ लाख ५० हजार र तेस्रो हुने टोलीले ७५ हजार रुपैयाँ प्राप्त गर्नेछन् । उत्कृष्ट स्पाईकर, ब्लकर, डिफेण्डर, लिफ्टर र प्रशिक्षकल समान १० हजार रुपैयाँ प्राप्त गर्नेछन् । उत्कृष्ट खेलाडीलाई गोल्छा अर्गनाइजेसनले पल्सर मोटरसाईकल प्रदान गर्ने बताइएको छ ।
