काठमाडौं(हाम्रो खेलकुद) दक्षिणा शाही ठकुरीले हङकङमा सम्पन्न २१औँ एसियन सिटिज तेक्वान्दो च्याम्पियनसीपमा नेपाललाई स्वर्णपदक दिलाएकी छन् ।
हङकङस्थित काउलुन पार्क स्पोर्ट्स हलमा भएको च्याम्पियनसिपमा महिला जुनियर ४२ केजीमुनि दक्षिणाले हङकङकी खेलाडीलाई हराउदै स्वर्ण हात पारेकी हुन् । क्याडेट २९ केजीमुनि सुप्रिमा बजगाई सडेन डेथमा मंगोलियाकी खेलाडीसँग स्तब्ध भइन् । निर्धारित तीन राउन्डको खेल ७–७ स्कोरको बराबरी भएपछि खेलिएको सडेन डेथ भने हार बेहोर्दै सुप्रिमा रजत पदकमै सिमित भइन् ।
पुरुष सिनियर ७४ केजीमुनिको फाइनलमा विकेस बिडारीले सुरुआती अग्रताका बाबजुत समालिन नसक्दा ६–४ स्कोरले हार बेहोर्दै रजतपदकमै सीमित भए । महिलाको सिनियर ६२ केजीमुनि लक्ष्मी घले र पुरुष क्याडेट ४५ केजीमुनि सुजन गुरुङ रजतमै सिमित भए । पुरुषतर्फ ५८ केजीमुनि मिसन रासकोटी, ६८केजीमुनि आकाश पुन, क्याडेट ४५ केजीमुनि सागर तङ्नामी, ६३ केजीमुनि अमृत थापा र ५४ केजीमुनि प्रकाश थापाले कास्यपदक जिते । महिलातर्फ सुमित्रा खत्रीले ७४ केजीमाथी कास्य पदक जितिन् । यससँगै अप्रिल २२–२५ सम्म भएको च्याम्पियनसिपमा कुमार लामा घिसिङको प्रशिक्षणमा रहेको नेपालले एक स्वर्ण, चार रजत र ६ कास्य गरी कुल ११ पदक हात पा¥यो ।
च्याम्पियनसिपमा १३ खेलाडी सहभागी भएका थिए । तेक्वान्दो संघका केन्द्रीय सदस्य तथा ग्रेडिङ प्रमुख नोर्बु लामाले निर्णायक भूमिका निर्वाह गरे । टिम व्यवस्थापकमा राजीव महर्जन र राजू खड्का रहेका थिए । प्रतियोगितामा हङकङ, ताइवान, मकाउ, चीन, मंगोलिया, सिंगापुर, नेपाल, इन्डोनेसिया, फिलिपिन्स, कोरियालगायतका राष्ट्रबाट खेलाडीहरुको सहभागिता थियो ।
