काठमाडौं (हाम्रो खेलकुद) – नेपाली खेलाडी अनुभव सुब्बा र शुभम श्रेष्ठले हंगेरीको बुढापेस्टमा जारी १७ औं फिना विश्व पौडी च्याम्पियनसिपमा नयाँ राष्ट्रिय कीर्तिमान बनाउका छन् ।
अनुभव सुब्बा (बायाँ) र शुभम श्रेष्ठ ।
पुरुषतर्फ ५० मिटर बटरफ्लाई २८.२६ सेकेन्डमा पूरा गर्दै अनुभवले राष्ट्रिय कीर्तिमान रचे । उनले सन् २००९ मा काठमाडौंमा भएको पाँचौं राष्ट्रिय खेलकुदको पौडीमा चन्द्रसिंह महतोले बनाएको २८.४३ सेकेन्डको कीर्तिमान तोडेका हुन् ।
त्यस्तै पुरुष १ सय मिटर ब्रेस्टस्ट्रोकमा शुभमले १ मिनेट ११.३४ सेकेन्डको कीर्तिमान बनाए । यसअघि १ मिनेट १२.२५ सेकेन्डको कीर्तिमान ओलम्पियन एलिस श्रेष्ठको नाममा थियो । एलिसले उक्त कीर्तिमान २००४ को एथेन्स ओलम्पिकमा बनाएका थिए ।
