गौरिकालाई ऐतिहासिक स्वर्ण!

काठमाडौं (हाम्रो खेलकुद) – पौडीबाज गौरिका सिंहले १३ औं दक्षिण एसियाली खेलकुद (साग) को महिला २ सय मिटर फ्रिस्टाइलमा स्वर्ण पदक जित्दै इतिहास रचेकी छिन् । यससँगै गौरिका पौडीमा व्यक्तिगत स्वर्ण जित्ने पहिलो नेपाली खेलाडी बनेकी छिन् ।

गौरिकाले आफ्नो स्पर्धामा भारतीय खेलाडीलाई पछि पार्दै स्वर्ण जितेकी हुन् । उनले निर्धारित दुरी २ मिनेट ५.०६ सेकेन्डमा पूरा गर्दै स्वर्ण हासिल गरेकी हुन् । भारतकि शिवांगी शर्मा २ मिनेट ७.१९ सेकेन्डको समय निकाल्दै दोस्रो भइन् । बंगलादेशकी जुनायाना अहमदले २ मिनेट १२.८३ सेकेन्डमा पुरा गर्दै कास्य जितिन् ।

सागको अघिल्लो संस्करणमा रजतमा सिमित भएकी गौरिकाले पहिलो स्वर्ण हासिल गरेकी हुन् । सन् २०१६ को रियो ओलम्पिकमा उक्त संस्करणको कान्छी ओलम्पियन भएपछि चर्चाको शिखरमा पुगेकी उनले आठौं राष्ट्रिय खेलकुदमा १२ स्वर्ण जित्दै इतिहास रचेकी थिइन् ।

गौरिकाले सागमा ८ स्पर्धामा प्रतिस्पर्धा गर्दैछिन् । १३ औं सागमा यो नेपालले जितेको ३३ औं पदक पनि हो ।