काठमाडौं (हाम्रो खेलकुद) – पौडीकी गौरिका सिंहले १३ औं दक्षिण एसियाली खेलकुद( साग) अन्तर्गत बिहीबार २ सय मिटर फ्रिस्टाइलमा स्वर्ण जित्दै इतिहास कायम गरिन् । नेपालका लागि पौडीतर्फ एकल विधामा पहिलो स्वर्ण जितेकी उनले पदक नेपाललाई समर्पण गरिन् ।

‘मलाई धेरैले तिमि नेपाली होइनभन्नुहुन्छ, तर म नेपाली हो,’ उनले स्वर्ण पदक देखाउँदै भनिन्, ‘ यो पदक सारा नेपाली र देश नेपालको लागि हो ।’ गौरिकाले बिहीबार नै टिम रिले इभेन्टतर्फ पनि डुआना लामा, तिसा शाक्य र अनुसिया तन्डुकारसँग मिलेर नेपालका लागि कास्य जितिन् । पछिल्लो संस्करणमा रजत पदकमा सिमित भएकी गौरिकाले यसपटक उत्कृष्ट प्रदर्शन गरिन् ।

‘ धेरै खुसी लागिरहेको छ । मैले यसको लागि निकै मिहिनेत गरेको थिएँ । मेरो परिवारले पनि मलाई सधैं साथ दिनुभएको छ । अझै राम्रो गर्ने विचार छ । अझै इभेन्ट बाँकी छन्,’ उनले भनिन् । गौरिकाले १३ औं सागमा कुल ८ इभेन्टमा प्रतिस्पर्धा गर्दैछिन् । सुरुवाती २ इभेन्टमा स्वर्ण र कास्य जितेपछि उनको झन् हौसला बढेको उनले बताइन् ।

सातदोबाटोस्थित इन्डोर पुलमा पहिलो पटक आयोजित प्रतियोगितामा गौरिका घरेलु समर्थकमाझ खेल्न निकै उत्साहित रहेको अभिव्यक्ति दिइन् । ‘ घरेलु समर्थनमा खेल्दा धेरै सहज भयो । नेपालमा पनि राम्रो पुल बनेको छ, बेलायतको जस्तै लाग्यो । पानी अलिकति चिसो भएपनि घरेलु समर्थनमा खेल्न मज्जा आयो,’ उनले थपिन् ।