क्रियटिभ भ्वाइस

टीएस ठकुरी

विश्व फुटबलका सर्वप्रिय अर्जेन्टिनाका लियोनल मेस्सी र हाम्रै कीर्तिमानी पौडीवाज गौरिका सिंहबीच एउटा समानता छ । दुवैलाई सम्बन्धित देशका अधिकांश खेलकर्मी र समर्थकहरु उनीहरुको राष्ट्रियतामाथि शंका गर्छन् ।

अर्जेन्टिनीले मेस्सीलाई गर्नेजस्तै व्यवहार गौरिकाले पनि नेपालमा भोग्नुपरेको छ । बेलायतमा जन्मेर उतै हुर्किएकी र उतै बसोबास गर्दै आएकी गौरिकालाई धेरै खेलकर्मी र समर्थक नेपाली मान्दैनन्, मेस्सीलाई अर्जेन्टिनीले आफ्नो नमानेजस्तै । अवसरकै लागि मात्र नेपाली पौडी रोजेको गौरिकामाथि आरोप छ, जसरी विश्वकपकै लागि मेस्सी अर्जेन्टिना फर्केजस्तै ।

यद्यपी गौरिका यो मान्न तयार छैनन् । उनी आफुलाई नेपाली मान्छिन् । बिहीबार साग इतिहासमा पहिलोपटक नेपाललाई व्यक्तिगत पहिलो स्वर्ण जिताएपछि १७ बर्षे गौरिकाले आफु नेपाली नै भएको फेरि एक पटक बताउनुपर्यो । उनले आफुले जितेको पदक नेपाल र नेपाली समर्थकमा समर्पण गरिन् । लगत्तै शुक्रबार उनले दोस्रो स्वर्ण पनि थपिन् । यो सिलसिला अझै उनले खेल्ने अन्य स्पर्धामा पनि दोहोरियोस भन्ने आशा रहेको छ । तर केहि यसमा फरक मत राख्ने पनि छन् ।

नेपालको राष्ट्रिय झण्डा अन्तर्राष्ट्रिय एरिनामा फहराउने दृढसंकल्प बोकेर अघि बढ्दा आलोचकको व्यवहारले गौरिकाको मन दुख्ने गर्छ, मुटु घोच्ने गर्छ । जबकि नेपालका लागि लगातार पदक जित्ने खेलाडी हुन् गौरिका ।

दक्षिण एसियाली खेलकुद(साग)को अघिल्लो संस्करणमा गौरिकाले रजत पदक जित्नुअघिसम्म नेपाली पौडीले अन्तर्राष्ट्रिय पदकको कल्पना पनि गरेको थिएन । तर, भारतको गुहाटी र सिलोङमा भएको सागको १२औं संस्करणमा गौरिकाले एक रजत र एक कास्य पदक जितेर नेपाली पौडी दक्षिण एशियाली स्तरमा स्पर्धा गर्न लायक रहेको प्रमाणित गरिदिएकी थिइन् ।

उनी हरेक छनोट चरणको प्रतियोगितामा सहभागि हुन आइपुग्छिन् । यही बैशाखमा नेपालगन्जको गर्मीलाई कत्ति पनि पर्वाह नगरी गौरिकाले हरेक स्पर्धामा पौडिएकी थिइन् । उनको यस्तै लगावका कारण उनीमाथि शंका गर्ने ठाउँ पक्कै छैन । उनको नेपालप्रतिको स्नेह र अपनत्व तारिफयोग्य छ । त्यही मेहनत, लगनशीलता र अनुशासन युवापुस्ताका लागि साँच्चिकै अनुशरणयोग्य हुनसक्छ ।

रियो ओलम्पिक (२०१६ ब्राजिल) मा सबैभन्दा कान्छी ओलम्पियनका रुपमा उनको नाम विश्वभर चर्चामा थियो । त्यतिबेला नेपालको चर्चा चुलिएको थियो । उता मेस्सीको चर्चासँग जति बार्सिलोना जोडिएको छ, उत्तिकै अर्जेन्टिना पनि जोडिएको हुन्छ । तर, अर्जेन्टिनीहरु मेस्सीको आलोचना गरेर थाक्दैनन् ।

अर्जेन्टिना छाडेर ठुला क्लबका लागि फुटबल खेल्न जाँदा मेस्सीले भावुक हुँदै कुनै समय भनेका थिए – ‘मैले फुटबलका लागि देश छाडें, साथी र परिवार छाडें । मैले मेरा साथी र आफन्त बदलें, केबल त्यही फुटबलका लागि सबै त्याग गरें ।’

मेस्सीको यो सब त्यागका कारण नै मेस्सी आज संसारभर साँच्चिकै मेस्सी भएका हुन् । फुटबलको जबर्जस्त क्रेज बढाउने माध्यम बनेका हुन् । सर्वत्र मेस्सीका फ्यान जन्मिनुका कारण पनि यिनै हुन् । उनी रोलमोडलका रुपमा स्थापित भएका छन् । आम आमाबाबुको सपना आफ्नो छोरा वा छोरीलाई मेस्सी जस्तै बनाउने चाहना पनि यस्तै कारणले हो ।

यता गौरिका पनि आफ्नो करिअरका लागि बेलायत बस्दै आएकी हुन् । उनले पौडीका लागि बेलायतमा गरेको साधना नै अहिलेको प्रतिफल हो । बेलायतको प्रशिक्षणले नै उनी यतिविधि खारिएकी हुन् । सानै उमेरमा ठुलासँग प्रतिस्पर्धा गर्न सक्ने भएकी हुन् ।

ससाना बालबालिकाका निम्ति उनी पनि रोलमोडल हुन् । बेलायतमा गरेको साधना नेपालका पक्षमा हुने भएपछि हामीले उनलाई सम्मान दिनैपर्छ । माया गर्नैपर्छ । अवसर सिर्जना गरिदिनैपर्छ । किनकी उनको जितले नेपालको शिर उँचो हुने हो ।

हो, मेस्सी क्लब फुटबलमा सफल छन् । देशको झण्डा उचाल्ने सवालमा उनी जहिल्यै अभागी सावित हुने गरेका छन् । उनीमाथि आरोप लाग्नुको कारण पनि यस्तै यस्तै हो । सन् २०१६ को कोपा अमेरिका फुटबलमा अर्जेन्टिनाका लागि विजय निकाल्न नसकेपछि मेस्सीले अन्तर्राष्ट्रिय फुटबलबाट सन्यास लिने घोषणा गरे । भलै मेस्सीले पछि सो घोषणा फिर्ता लिए ।

यही बिषयलाई लिएर ब्राजिलका स्टार नेयमारले उतिखेर दुखी हुँदै भनेका थिए –‘मेस्सीले आफ्नो घोषणा त गरे, तर मेस्सीबिनाको फुटबल त फुटबल नै हुन सक्दैन । उनीबिना फुटबल परिकल्पनै गर्न सकिन्न ।’ मेस्सी जस्तो सुपरस्टारका कारण फुटबलको आकर्षण थपिएको र फुटबलको दिनानुदिन आकर्षण बढ्दै गएको नेयमारले राम्रोसँग बुझेका छन् ।

मेस्सीका कारण हरेक अभिभावकले आफ्नो सन्तानलाई रोलमोडल बनाउने सपना देख्छन् । हुनपनि नेयमारको देश त्यही देश हो, जहाँका प्रत्येक बुबाआमाहरु आफ्ना सन्तानलाई फुटबल स्टार बनाउने सपना देख्छन्, र सानैमा छोराछोरीलाई फुटबल किनिदिन्छन् ।

नेपालको परिवेशमा पनि गौरिका एउटा यस्तो रोलमोडल हुन सक्छिन्, जहाँ पढाइमा लागेपछि बिग्रन्छन् भन्ने पुरातन सोंच छ । यो सोचलाई तोड्न गौरिका एउटा पात्र हुनसक्छिन् । गौरिकाको लोभलाग्दो प्रदर्शन हेरेर धेरै पौडीमा आकर्षित हुन सक्छन् । गौरिकाले पौडीलाई नयाँ बाटो देखाइसकेकी छिन् । सबैले भन्ने दिन टाढा छैन –‘बेलायतमा पढ्ने पनि नेपालमा खेल्न आउने रैछन्, हामी यहीं भएर किन नखेल्ने?’

अनि सबैजना महसुस गर्नेछन् –‘खेलले पढाइलाई बाधा पुग्दो रैनछ, हेर त गौरिकालाई । पढ्दै खेल्दै । खेल्दै पढ्दै ।’ गौरिकाका लागि अर्को पनि आधार तयार हुँदै जाने निश्चित छ । किनकी मेस्सीले पो देशका लागि अहिलेसम्म स्वर्ण जित्न सकेका छैनन्, गौरिकाले त बिहीबार साग इतिहासमै पहिलो स्वर्ण जितेर देखाइन् । पदकतालिकामा नेपाललाई माथि उक्ल्याउन योगदान गरिन् । त्यसैले सबैले भन्नुपर्छ –‘गौरिका हाम्री हुन् ।’