काठमाडौं (हाम्रो खेलकुद)– गत साता सम्पन्न १३ औं दक्षिण एसियाली खेलकुद (साग) की ४ स्वर्ण पदक विजेता पौडी खेलाडी गौरिका सिंह र पूर्व मिस नेपाल श्रृखंला खतिवडा प्रदेश ३ को सद्भावना दुत नियुक्त भएका छन् । भ्रमण वर्ष २०२० का लागि प्रदेश सरकारले गौरिका र श्रृखंलासँग शुक्रबार सद्भावना दुत नियुक्त गरेको हो ।
१७ वर्षे गौरिकाले गत साता सम्पन्न सागमा ४ स्वर्ण, २ रजत र टिम इभेन्ट्समा ३ कास्य पदक जितेकी थिइन् । सागको पौडीमा एकलतर्फ स्वर्ण पदक जित्ने गौरिका एक्ली नेपाली हुन् । बेलायतमा परिवारका साथ बसोबास गर्दै आएकी गौरिकाले सन् २०१६ मा भएको १२ औं सागमा १ रजत र ३ कास्य पदक जितेकी थिइन् ।
सागमा उनको पद संख्या १३ पुगेको छ । २०१६ मै गौरिकाले रियो ओलम्पिकमा नेपालको प्रतिनिधित्व गरेकी थिइन् । त्यो ओलम्पिकमा उनी सबैभन्दा कान्छी उमेरकी खेलाडी थिइन् । त्यति बेला उनको उमेर १३ वर्ष थियो ।
