एजेन्सी – भारतीय टेष्ट स्टार चेतेश्वर पुजारालाई महेन्द्रसिंह धोनी कप्तान रहेको चेन्नई सुपर किंग्सले इन्डियन प्रिमियर लिग (आइपिएल) २०२१ को अक्सनमा खरिद गरेको छ ।

पुजारालाई चेन्नईले न्यूनतम मूल्य ५० लाख भारतीय रुपैयाँमा खरिद गरेको हो । योसँगै पुजारा ७ वर्षपछि आइपिएलमा फर्किने भएका छन् । टेष्ट क्रिकेटमा भारतीय टोलीका पहिलो रोजाईका पुजाराले पछिल्लो पटक २०१४ मा पन्जाबबाट मुम्बईविरुद्ध वानखडे स्टेडियममा खेलेका थिए ।

उक्त सिजन पन्जाब पहिलो पटक फाइनलमा पुग्दै कोलकाता नाइट राइडर्ससँग ३ विकेटले पराजित भएको थियो । पुजाराले आइपिएलमा डेब्यू २०१० मा कोलकाताबाट दिल्लीविरुद्ध डेब्यू गरेका थिए । उनले कुल ३० आइपिएल खेलमा ३ सय ९० रन बनाएका छन् ।

चेन्नईमा जारी अक्सनमा सर्वाधिक महँगो मूल्यमा दक्षिण अफ्रिका अलराउन्डर क्रिस मोरिस १६ करोड २५ लाख भारुमा राजस्थान रोयल्समा पुगेका छन् । जुन आइपिएल अक्सनमा कुनैपनि खेलाडीले पाएको हालसम्मकै उच्च मूल्य हो । रोयल च्यालेन्जर्स बेंगलोरले न्युजिल्यान्डका अलराउन्डर काइल जामिसनलाई १५ करोड भारु र अष्ट्रेलिया आक्रामक ब्याट्सम्यान ग्लेन म्याक्सवेललाई १४ करोड २५ लाख भारुमा खरिद गरेको छ ।

चेन्नईले कृष्णप्पा गौवथमलाई ९ करोड २५ लाख र इंग्ल्यान्डका स्पिन अलराउन्डर मोइन अलीलाई ७ करोडमा खरिद गरेको छ । किंग्स इलेभेन पन्जाब झेय रिचर्डसनलाई १४ करोड र राइली मेरिडीथलाई ८ करोड भारुमा खरिद गरेको छ । नेपाली लेगस्पिनर सन्दीप भने ‘अनसोल्ड’ भएका छन् ।