काठमाडौं (हाम्रो खेलकुद) – गौरिका सिंह उमेरले भर्खर १८ वर्ष पुग्दैछिन् । तर सफलताको हिसाबले उनी नेपाली खेलकुद इतिहासकै सर्वाधिक सफल खेलाडी बनिसकेकी छिन् । १३ औं सागमा व्यक्तिगत ४ स्वर्ण जित्नुले उनको चर्चा थप चुलियो ।

पछिल्ला वर्षहरुमा बेलायत रहेर प्रशिक्षण गर्दै प्रतियोगिता खेल्न नेपाल आउने गरेकी गौरिका यसपटक भने प्रशिक्षणकै लागि नेपाल आइपुगिन् । बेलायतमा लकडाउनका कारण प्रशिक्षण गर्न सम्भव नभएपछि उनी गत महिना नेपाल आइपुगेकी हुन् । नेपाल आएपछि केहि दिन क्वारेन्टाइन बसेकी उनी कोरोना परिक्षण नेगेटिभ आएपछि प्रशिक्षण गर्दैछिन् ।

गौरिका हाल काठमाडौंमै रहेर ओङदेन लामासँग प्रशिक्षण लिइरहेकी छिन् । कोरोनाका कारण लामो विश्राम लिएपछि अहिले उनलाई पुरानै लयमा फर्कन केहि समय लाग्ने प्रशिक्षक लामा बताउँछन् । अहिले प्रशिक्षणमा पनि उनले सामान्य गतिमा प्रशिक्षण गरिरहेकी छिन् । प्रशिक्षक लामाले गौरिकाको क्षमतासँगै परिवारको पनि साथ रहेको हुँदा उनले एसियाली खेलकुदमा पदक दिलाउन सक्ने विश्वास राखेका छन् ।

गौरिका आफैं कोरोनाका कारण धेरै क्षेत्रमा असर परेकोमा दुखी छिन् । ओलम्पिक स्थगित हुँदा कतिपय खेलाडीको करिअरमा असर परेको छ । तर उनलाई व्यक्तिगत रुपमा भने यसले तयार हुने थप समय दिएको छ । १३ औं सागको सफलतालाई इतिहासमा नै राखेर उनी अहिले ओलम्पिकमा ध्यान दिइरहेकी छिन् ।

पूर्ण भिडियो हेर्नुहोस् :

प्रशिक्षणका तस्बिरहरु :