काठमाडौं (हाम्रो खेलकुद) – दाबेदार मध्येको एक न्यू डाइमन्ड एकेडेमीले १२ औं ढोरपाटन डबल लिग महिला भलिबल प्रतियोगितामा पहिलो हार बेहोरेको छ । अघिल्लो दिन अर्को दाबेदार एपिएफलाई हराएको भारतीय राष्ट्रिय खेलाडी सम्मिलित रिड मोडल कलेजले शुक्रबार न्यू डाइमन्डलाई ३–० को सोझो सेटमा पराजित गरेको छ ।

बालाजु नयाँ बसपार्कस्थित ढोरपाटन स्पोर्टस् ट्रेनिङ सेन्टरको नवनिर्मित कोर्टमा रिड मोडलले २५–१६, २५–२१ र २५–२३ मा नतिजा आफ्नो पक्षमा पारेको थियो । न्यू डाइमन्डकी प्रतिभा मालीले लगातार उत्कृट स्पाइक गरे पनि भारतीय खेलाडीकले उनलाई सफल हुन दिएनन् ।

अघिल्ला ६ खेलमा लगातार जित निकालेको न्यू डाइमन्डको शुक्रबार डिफेन्स कमजोर देखिएको थियो । हारका वावजुद न्यू डाइमन्ड शीर्षस्थानमा कायम छ । न्यू डाइमन्डलाई हराउनु अघि रिड मोडलले रामेछापको चन्डेश्वरी युवा क्लवलाई २५–४, २५–१० र २५–१३ को सेटले हराएको थियो ।

शुक्रबार अन्य खेलमा एपिएफ,पश्चिमाञ्चल क्षेत्रिय भलिबल संघ र न्यू डाइमन्ड स्पोर्टस् क्लब विजयीभ एका थिए । एपिएफले आयोजक ढोरपाटन स्पोर्टस् क्लवलाई २५–८, २५–१० र २५–१० को सोझो सेटमा हरायो । पश्चिमाञ्चलले नेपाल आर्मीलाई २५–१५, २५–२१ र २५–२३ ले हराउँदै पाँचौं स्थानमा उक्लिएको छ । न्यू डायमन्ड स्पोर्टस् क्लबले बिजेश्वरी ज्ञान मन्दिर स्कुललाई लाई २०–२५, २५–२०, २२–२५, २५–१८ र १६–१४ ले हराएको थियो ।

अघिल्ला खेलसम्म दुवै टोली अंक विहिन थिए । शुक्रबारको नतिजापछि न्यू डाइमन्ड स्पोर्टस् क्लबले २ र बिजेश्वरीले १ अंक प्राप्त गरे । लिगको शीर्ष टोली न्यू डाइमन्डको ७ खेल १८ अंक छ । ६ खेलमा पाँचौ जित निकालेको एपिएफ १५ अंकका साथ दोस्रो स्थानमा उक्लेको छ । ७ खेलबाट १५ अंक बटुल्दै अर्को विभागिगय टोली नेपाल पुलिस तेस्रो स्थानमा छ । ४ खेलमा अपराजित रिड मोडलको १२ अंक छ । पश्चिमाञ्चलको पनि ५ खेलमा १२ अंक छ ।