पोखरा (हाम्रो खेलकुद) – कास्की जिल्ला भलिवल संघ र सृजना विकास केन्द्रको संयुक्त आयोजनामा पोखरामा सामुदायिक माविस्तरीय छात्र-छात्रा भलिबल प्रतियोगिता आयोजना हुने भएको छ । आयोजकद्वयले बिहिबार पोखरामा पत्रकार सम्मेलनको आयोजना गर्दै प्रतियोगिता माघ ८ देखि १२ गतेसम्म हुने जानकारी गराएको हो ।
पोखरा रंगशालास्थित भलिवल ट्रेनिङ सेन्टरमा हुने प्रतियोगितामा कास्कीका सामुदायिक (सरकारी) विद्यालयहरुको सहभागिता रहने कास्की जिल्ला भलिवल संघका अध्यक्ष भीम पराजुलीले बताए । कक्षा १२ सम्म अध्ययनरत विद्यार्थी सहभागी हुने प्रतियोगितामा छात्र तथा छात्रा दुबैतर्फ ५०–५० टिमको सहभागिता रहने आयोजकले अनुमान गरेको छ । राष्ट्रिय तथा अन्तर्राष्ट्रिय खेलाडी उत्पादन गर्ने उद्देश्यले प्रतियोगिता आयोजना गरिएको आयोजक सृजना विकास केन्द्रका अध्यक्ष मीनप्रसाद भट्टराईले बताए ।
प्रतियोगिताको छात्र तथा छात्रा दुवैतर्फको विजेताले समान ५० हजार रुपैयाँ पाउनेछन् । दोस्रो हुनेले ३० हजार तथा तेस्रो हुनेले १५ हजार रुपैयाँ प्राप्त गर्नेछन् । सबै टिमलाई तयारीका लागि ५-५ हजार प्रदान गरिने छ । त्यस्तै, प्रतियोगितामा उत्कृष्ट स्पाइकर, उत्कृष्ट डिफेन्डर, उत्कृष्ट लिफ्टर, उत्कृष्ट सर्भर र उत्कृष्ट प्रशिक्षकलाई पनि पुरस्कृत गरिने छ ।
प्रतियोगिता सञ्चालन गर्न करीब ८ लाख ५० हजार खर्च लाग्ने अनुमान गरिएकोे सृजना विकास केन्द्रका प्रथम उपाध्यक्ष तथा प्रचारप्रसार संयोजक ईन्द्र पौडेलले जानकारी दिए ।
