काठमाडौं (हाम्रो खेलकुद) – थ्री स्टार एकडेमी बुढानिलकण्ठ प्रथम एन्जल्र्स हर्ट अन्तर विद्यालय/कलेजस्तरीय राष्ट्रिय पुरुष भलिबल प्रतियोगिताको च्याम्पयन बनेको छ ।

बुधबार भएको फाइनलमा थ्री स्टारले न्युटन हाइ स्कुल बालुवाटारलाई ३–१ को सेटमा पराजित गर्दै च्याम्पियन बनेको हो । नयाँ बसपार्कस्थित ढोरपाटन क्लबको कोर्टमा बुधबार भएको खेलमा थ्री स्टारले न्युटनमाथि २५–२२, २५–१७, २२–२५ र २५–१९ ले विजयी हुन सफल भयो । स्पाइरल ग्यालेक्सी स्कुल पोखराले सामाखुशी इंग्लिस बोर्डिङ स्कुल (सेव)लाई ३–१ को सेटमा पराजित गर्दै तेस्रो स्थान हात पार्यो । स्पाइरलले २५–१८ २५–२१, २२–२५ र २५–१९ को जित निकाल्यो ।

च्याम्पियन बनेसँगै थ्री स्टारले १ लाख रुपैया हात पार्यो । दोस्रो भएको न्युटनले ५० हजार रुपैयामा चिक्त बुझायो । तेस्रो भएको ग्यालेक्सीले २५ हजार तथा चौथो भएको सेवले १५ हजार रुपैया पायो ।
च्याम्पियन थ्री स्टारका बिशाल गुरुङ प्रतियोगिताको सर्वाेत्कृष्ट खेलाडी चुनिए । उनले एक थान टिभीएस मोटरसाइकल हात पारे ।

व्यक्तिगत विधातर्फ स्प्रिङडेलका दुर्गा सुनार बेस्ट स्पाइकर, न्युटनका सुजन विके सेटर, स्पाइरलका अशोक सुनार सर्भर, थ्री स्टारका किरण चौधरी ब्लकर, न्युटनका डोल बहादुर थापामगर डिफेन्स र थ्री स्टारका राजन दर्लामी मगर उत्कृष्ट प्रशिक्षक चुनिए । उनीहरुले समान ५–५ हजार रुपैया पाए ।

विजयी खेलाडीहरुलाई सभासद ठाकुर गैरे, एन्जल्र्स स्पोर्टस् एकेडेमीका अध्यक्ष खिम राना, एन्जल्र्स हार्ट कलेजका प्रिन्सिपल लगायतले पुरस्कार वितरण गरे । एन्जल्र्स स्पोर्टस् एकेडेमी एण्ड रिक्रिएसन सेन्टरको आयोजनामा १५ जेठबाट शुरु भएको प्रतियोगितामा देशभरका विभिन्न ५३ विद्यालयले लिगकम नकआउटका आधारमा प्रतिस्पर्धा गरेका थिए । सहभागी टोलीलाई १६ समूहमा विभाजन गरिएको थियो ।