लेजेण्डहरुको खेलमा बार्सिलोना युनाइटेडसँग पराजित

बार्सिलोना (एजेन्सी) – स्पेनी क्लब बार्सिलोना र इङ्गलिस क्लब म्यानचेस्टर युनाइटेडका लेजेण्डहरु बीच भएको मैत्रीपूर्ण खेलमा बार्सिलोना ३-१ले पराजित भएको छ। बार्सिलोनाको घरेलु मैदान क्याम्प नोउमा खेलिएको खेलमा फुटबलका ठुला ठुला हस्तीहरुको उपस्थिति रहेको थियो।

बार्सिलोनाबाट रोनाल्डिन्हो, रिभाल्डो, लगायतका खेलाडीहरु खेलेका थिए भने युनाइटेडका लागि जि सुङ पार्क, ड्वाइट योर्क, लगायतका खेलाडीहरु उपस्थित रहेका थिए।

खेलको १४औं मिनेटमा ब्लंकभिष्टले गोल गर्दै युनाइटेडलाई अग्रता दिलाएका थिए भने पोबोर्सकीले दोश्रो हाफको ५७औं मिनेटमा अग्रता दोब्बर पारेका थिए। ड्वाइट योर्कले ७७औं मिनेटमा स्कोर ३-० बनाएका थिए। बार्सिलोनाका लागि देहुले ९०औं मिनेटमा सान्त्वना गोल गरेका थिए।

यस खेलको दोश्रो लेग सेप्टेम्बर २ तारिखका दिन म्यानचेस्टर युनाइटेडको घरेलु मैदान ओल्ड ट्रयाफर्डमा हुनेछ। खेलको आयोजना डिजर नामक संगीत प्रकाशक संस्थाले गरेको हो। यस खेलबाट उठेको सम्पूर्ण रकम दान गरिनेछ।