काठमाडौं (हाम्रो खेलकुद) – विश्व कराते महासंघ (डब्लुकेएफ) र एसियन कराते फेडेरेसन (एकेएफ) का प्रतिनिधिसँग नेपाल कराते महासंघ (एनकेएफ) का अध्यक्ष युवराज लामाको टोलीले अर्को साता मलेसियामा भेट गर्ने भएको छ ।

एनकेएफको पछिल्लो ५ वर्षको प्रक्रियासँग पछिल्लो निर्वाचनलगायत सबै विषयमा डब्लुकेएफ र एकेएफलाई जानकारी गराउने भ्रमणको उद्देश्य रहेको महासंघका अध्यक्ष लामाले जानकारी दिए ।

लामासहित एनकेएफको टोलीमा उपाध्यक्ष तथा रेफ्री संयोजक प्रकाश धौवडेल, महासचिव दावा गुरुङ र कोषाध्यक्ष किशोर भट्टराई रहेका छन् । आइतबार त्यसतर्फ जाने टोलीले मंगलबार डब्लुकेएफ र एकेएफका जिम्मेवार प्रतिनिधिसँग भेट गर्ने तयर भएको लामाले जानकारी दिए ।

‘२०७५ सालमा युवा तथा खेलकुद मन्त्रालय, नेपाल ओलम्पिक कमिटी (एनओसी) र राष्ट्रिय खेलकुद परिषद्को रोहवरमा दुई कराते महासंघलाई एक बनाउने निर्णयपछि एउटा प्रक्रिया प्रारम्भ भएको थियो,’ लामाले भने, ‘त्यसयता पछिल्लो पटक हामीले निर्वाचन सम्पन्न गर्यो । यो सबै विषयमा हामी सिलसिलेबार जानकारी गराउनेछौं । मलाई आशा छ अब यसले एनकेएफका बारेमा कुनै दुविधा रहेछ भने प्रष्ट हुनेछ ।’

लामा नेतृत्वको एनकेएफले १९ औं एसियाली खेलकुदका लागि खेलाडी छनोट गरिसकेको छ । सँगै पुरेन्द्रविक्रम लाँखे अध्यक्ष रहेको भनिएको महासंघले पनि खेलाडी छनोट गरेको छ । यसले अझै पनि कराते महासंघको दोहोरो अस्तित्व रहेको देखिन्छ ।

यद्दपी राखेप र एनओसीले भने लामाले नेतृत्व गरेको एनकेएफनै आधिकारिक रहेको र एसियाली खेलकुद पनि त्यहि महासंघले छनोट गरेको खेलाडी जाने प्रष्ट पारिसकेका छ । एनकेएफको २५ वर्षदेखि डब्लुकेएफमा नविकरण हुन सकेको छैन । लामाका अनुसार नविकरणका लागि ६५ लाख रुपैयाँ तिर्न बाँकी छ । ‘त्यो विषयमा पनि हामीले छलफलको प्रयास गर्नेछौं,’ लामाले भने ।