काठमाडौं (हाम्रो खेलकुद)– नेपालका नम्बर एक व्यवसायिक गल्फर शिवराम श्रेष्ठले १० स्ट्रोकको अग्रताका साथ सूर्य नेपाल च्यालेन्ज गल्फ उपाधि जितेका छन् । रोयल नेपाल गल्फ क्लब (आरएनजिसी) को पार ६८ मा अन्तिम दिन शुक्रबार शिवरामले ४ अन्डर ६४ को प्रदर्शन गरे । समग्रमा ८ अन्डर २ सय ६४ को प्रदर्शन गर्दै सूर्य नेपाल गल्फ टुर २०१६÷१७ को लगातार दोस्रो उपाधि जितेका हुन् । खेल जीवनमा त्यो शिवरामको ३२ औं उपाधि हो । उपाधिसहित शिवरामले ७५ हजार रुपैयाँ प्राप्त गरे ।
दोस्रो स्थानको भुवनले शुक्रबार २ ओभर ७० को कार्ड बनाउँदै समग्रमा २ ओभर २ सय ७४ को प्रदर्शन गरे । उनले ४६ हजार प्राप्त गरे । जयराम (७४) र सञ्जय लामा (६९) संयुक्त रुपमा तेस्रो स्थानमा रहे । उनीहरुले समान २९ हजार २ सय ५० हजार रुपैयाँ प्राप्त गरे । रामे मगर (७३) २ सय ७९ को कार्ड बनाउँदै पाँचौं स्थानमा रहे र उनले २३ हजार रुपैयाँ हात पारे ।
रवि खड्का छैटौं स्थानमा रहे । अन्तिम दिन ३ ओभर ७१ को प्रदर्शन गरेका रविले समग्रमा २ सय ८१ को कार्ड बनाए । रविले २१ हजार रुपैयाँ पाए । चुडाबहादुर भण्डारी, धनबहादुर थापा र दीपक मगर संयुक्त रुपमा सातौं भए र जनही १७ हजार ३ सय ३३ रुपैयाँ प्राप्त गरे । सूर्यप्रसाद शर्माले १० औं स्थान प्राप्त गरे र १५ हजार रुपैयाँ प्राप्त गरे ।
अघिल्लो दिन शीर्षस्थानमा रहेका शिवरामले दाई जयरामलाई दुई स्ट्रोकले पछाडि पारेका थिए । शुक्रबार फ्रन्ट नाइनको प्रदर्शनपछि शिवरामले ३ स्ट्रोकको अग्रता बनाएका थिए । फ्रन्ट नाइनमा शिवरामले १ ओभर ३५ को कार्ड बनाउँदा जयरामले ३६ र भुवनले ३४ को प्रदर्शन गरेका थिए । तर, शिवरामले ब्याक नाइनमा प्रदर्शनमा सुधार गरे । उनले ५ अन्डर २९ को कार्ड बनाउँदा भुवनले ३६ र जयरामले ४ ओभर ३८ को प्रदर्शन गरेका थिए ।
फ्रन्ट नाइनको दोस्रो र चौथोमा बोगी खेपेका शिवरामले पाँचौं होलमा एकमात्र बर्डि गरेका थिए । ब्याक नाइमा भने १० औं, ११ औं र १७ औं होलमा बार्डि गरेका उनले १३ होलमा इगल गरे । बर्डिका साथ दिनको सुरुआत गरेका भुवनले फ्रन्ट नाइनको आठौं होलमा बोगी खेपेका थिए । ब्याक नाइनको ११ औं होलमा बर्डि गरेका उनले १२ औं, १४ औं र १५ होलमा बोगी गरे ।
एमेच्योरको उपाधि सन्तोष रोक्काले जिते । खेल जीवनमा उनको त्यो पहिलो उपाधि हो । १९ ओभर २ सय ९१ को प्रदर्शन गर्दै उनले उपाधि जितेका थिए । धरानका जीवन राई दोस्रो भएका थिए । उनले १४ औं होल पार ३ मा होल इन वान गरेका थिए । उनले समग्रमा २ सय ९२ को प्रदर्शन गरे । अघिल्लो दिन शीर्षस्थानमा रहेको मिथुन राई तेस्रो भए ।
२९ व्यवसायिक र ११ एमेच्योर गरि प्रतियोगितामा ४० खेलाडीको सहभागिा थियो । दुई दिनको प्रदर्शनपछि व्यवसायिकतर्फका शीर्ष २२ र एमेच्योरतर्फका शीर्ष ६ खेलाडीलाई अन्तिम दुई चरणका लागि छनोट भएका थिए । ४ लाख रुपैया पुरस्कार राशी रहेको प्रतियोगिताका विजेतालाई सूर्य नेपालका मार्केटिङ म्यानेजर बालकृष्ण गुरुङ र नेपाल गल्फ संघका अध्यक्ष मधुकर याकथुम्बाले पुरस्कृत गरे । नेपाल प्रोफेसनल गल्फर एसोसिएसनले आयोजना गरेको चार दिने प्रतियोगितालाई सूर्य नेपाल प्रा.लि.ले प्रायोजन गरेको थियो ।
