काठमाडौं (हाम्रो खेलकुद)– बसन्तराज गुरुङले सूर्य नेपाल गल्फ टुर अन्तर्गत मंगलबार सुरु भएको एनपिजीए छनोट स्कुल प्रतियोगिताको पहिलो दिन अग्रता लिएका छन् ।
पार ६८ को रोयल नेपाल गल्फ क्लबमा सुरु भएको प्रतियोगितामा बसन्तले १ ओभर ६९ खेले । भुवन कुमार रोक्का दोस्रो स्थानमा छन् । भुवनले ३ ओभर ७१ को प्रदर्शन गरे । ७ ओभर ७५ को स्कोर कार्ड बनाएका दिनेश नगरकोटी तेस्रो स्थानमा छन् ।
७६ खेलेका दल लामा चौथो र ७७ खेलेका भुवन गुरुङ पाँचौं स्थानमा छ । किशन कालिराज र नारायण चौलागाई ७९ स्कोरका सात संयुक्तरुपमा छैटौं स्थानमा छन् । ८० स्कोर कार्ड बनाएका अमित बोगटी र रोहित आचार्य दशौं भित्र अटाएका छन् ।
नेपाल प्रोफेसनल गल्फर्स एसोसिएसन (एनपिजिए) ले आयोजना गरेको प्रतियोगितामा २० खेलाडीले प्रतिस्पर्धा गरिरहेका छन् । ५४ होलको तीनदिने प्रतियोगितामा उत्कृष्ट पाँचभित्र पर्ने खेलाडी प्रोमा बढुवा हुनेछन् । प्रोमा बढुवा भएका खेलाडीले एनपिजिएको आयोजनामा हुने व्यवसायिक प्रतिस्पर्धामा भाग लिन पाउने बताइएको छ । स्कुल छनोटको विजेताले ५ हजार, दोस्राले ३ हजार र तेस्रो हुने खेलाडीले २ हजार रुपैयाँ पाउनेछन् ।
