धादिङ (हाम्रो खेलकुद) – छैटौं राष्ट्रिय भेट्रान बुद्धिचाल प्रतियोगितामा तीन पटकका पूर्व नेपाल च्याम्पियन बद्रीलाल नेपालीले एकल अग्रता लिएका छन् । बद्रीलालले पाँचौ चरण सम्मको खेलमा ४ जित, एक बराबरी खेल्दै ४.५ अंक जोडेर शीर्षस्थानमा रहेका छन् ।

नेपाल बुद्धिचाल महासंघको आधिकारिक क्यालेण्डर प्रतियोगिता मध्येको एक ‘छैटौं राष्ट्रिय भेट्रान’ प्रतिस्पर्धामा बद्रीलालले स्याङ्जाका मोहन सिं प्रधान, भक्तपुरका जगन्नाथ ताम्राकार, ताप्लेजुङका हर्कबहादुर चोङ्वाङ र भक्तपुरका गणेशमान दुवाललाई हराएका थिए भने ललितपुरका एफएम बिलमलाल श्रेष्ठसँग बराबरी खेलेका थिए ।

बुद्धिचाल महासंघ र धादिङ जिल्ला बुद्धिचाल संघको संयुक्त आयोजनामा सञ्चालन भइरहेको प्रतियोगितामा भक्तपुरका जगन्नाथ ताम्राकार, काठमाडौंका सिएम नवीन तण्डुकार र सिएम भगवती प्रसाद शर्माले समान ४ अंक बनाएर संयुक्त दोश्रो स्थानमा छन् ।

भक्तपुरका जगन्नाथले आज चौथो चरणमा सिएम नवीन र पाँचौ चरणमा धादिङका तारामान श्रेष्ठलाई पराजित गरे । त्यस्तै पूर्व नेपाल च्याम्पियन सिएम नवीन तण्डुकारले चौथोमाजगन्नाथ सँग हार व्यहोर भने पाँचौमा सप्तरीका विनोद कुमार गुप्तालाई पराजित गरे ।

त्यसैगरी सिएम भगवती प्रसाद शर्माले चौथो चरणमा ताप्लेजुङका हर्कबहादुरलाई र पाँचौ चरणमा भक्तपुरका गणेशमानलाई हराए । पूर्व नेपाल च्याम्पियन एफएम बिलमलाल ३.५ अंक जोडेर तेश्रोमा छन्। तेश्रो चरणमा पूर्व नेपाल च्याम्पियन नविनसँग हार व्यहोर्नु परेको थियो भने बद्रीलाल सँग बराबरी खेले ।

धादिङ जिल्ला थांक्रे गाउँपालिकामा सञ्चालन भइरहेको च्याम्पियनसिपको अन्तिम दुई चरण सोमवार हुनेछ । १८ जना राष्ट्रिय शीर्ष भेट्रान खेलाडीले प्रतिस्पर्धा गरिरहेको प्रतियोगिताका विजेताले ४० हजार, दोस्रोले २०, तेस्रोले १५, चौथोले १०, पाँचौले ८, छैटौं र सातौंले समान ५ हजार रुपैयाँ प्राप्त गर्नेछन्।