काठमाडौं (हाम्रो खेलकुद)- सिंगापुरमा सन्चालन भएको १६ ओै एशियन प्यासिफिक सितोरियो कराते प्रतियोगितामा नेपालले २ स्वर्ण, २ रजत र ५ कांस्य गरि कुल ९ पदक जितेको छ ।

नेपालको लागि सिनियर महिला तर्फ ६८ केजी तौल भन्दा माथि समुहमा १९ ओै एसियाली खेलकुदकी रजत पदक विजेता एरिका गुरुङले नेपाललाई स्वर्ण पदक दिलाइन् । त्यसैगरि महिला तर्फकै ५० केजी मुनीको तौल समुहमा अन्जली महर्जनले नेपाललाई स्वर्ण पदक दिलाइन् ।

एलिशा रासकोटी मगर, टपी थापा र मेघा लिम्बुको समूहले महिला तर्फको टिम कातामा रजत पदक जितेको छ। निरुपा दोङ तामाङले सिनियर महिलाको ५५ केजी मुनिको तौल समुहमा रजत पदक जितिन् ।

त्यसैगरि सिनियर महिला एकल कातामा एलिशा रासकोटी मगर कास्य पदक प्राप्त गरिन् ।
महिला जुनियर तर्फ ४५ केजी मुनिको तौल समुहमा पोरसिया चौधरी, ६८ केजी मुनि तौल समुहमा आशिका राईले कास्य पदक जितिन् ।

पुरुष तर्फको १६ बर्ष मुनि एकल कातामा रेहान जावेद र सिनियर पुरुष तर्फ ८४ केजी मुनिको तौल समूहमा मोहम्मद शेखु आलमले नेपाललाई कांस्य पदक दिलाए ।

१२ खेलाडी, प्रशिक्षक, व्यवस्थापक, रेफ्री,अफिसियल गरि कुल ३० जनाको नेपाली टोलीले एशियन प्यासिफिक सितोरियो करातेमा भाग लिएको नेपाल सितोरियो कराते संघका प्रवक्ता गजेन्द्र वहादुर खपाङ्गी ‘ईश्वर’ले जानकारी दिए ।

एशियन प्यासिफिक सितोरियो करातेको आइतवार हुने बिशेष अधिवेशमा नेपाल सितोरियो कराते संघका अध्यक्ष दावा गुरुङ र सितोरियो करातेका संरक्षक समेत रहेका नेपाल कराते महासंघका अध्यक्ष युवराज लामा सहभागी हुने बताइएको छ। नेपाली कराते टोली सोमवार स्वदेश फर्कनेछ ।