काठमाडौं (हाम्रो खेलकुद)- सूर्य नेपाल इस्टर्न ओपनको पहिलो दिन बुधवार ८-अन्डर ६२ को प्रभावशाली बोगी रहित स्कोरमा निरज तामाङ शीर्षस्थानमा रहेका छन्।

घरेलु प्रो निरजले धन बहादुर थापालाई ४ स्ट्रोकले पछि पार्दै शीर्षस्थानमा रहे। धरान स्थित धरान गल्फ क्लबमा आज निरजले ८-अन्डर ६२ को उत्कृष्ट स्कोरकार्ड दर्ज गर्ने क्रममा तेस्रो, पाँचौं, छैटौं र नवौं होलमा एक-एक सट बचाए। उनले फ्रन्ट नाइनमा ४-अन्डर ३२ मा खेले।

त्यसपछि ५-पारको १२औ होलमा इगलको सफलता प्राप्त गरे। उनले १५औं र १८औं होलमा पनि बर्डी प्रहार गरे। ब्याक नाइन पनि ४-अन्डर ३० मा सकाउँदै सानदार सुरूवात गरेका छन्। सिजनको दोस्रो प्रतियोगिता काठमाडौं ओपनमा पनि उनले प्रोतर्फ पहिलो स्थान प्राप्त गरेका थिए।

त्रिभुवन आर्मी क्लबका धन बहादुर थापाले ४-अन्डर ६६ को स्कोरमा पहिलो १८ होलको खेल दोस्रो स्थानमा सकाए। उनले दोस्रो होलमा बोगीको समाना गरे। त्यसपछि कमब्याक गर्दै तेस्रो, आठौं र नवौं होलमा बर्डी प्रहार गरे। फ्रन्ट नाइन २-अन्डर ३४ मा सकाए। यसपछि १३औं होलको बोगी विरूद्ध १२औं, १६औं र १८औं होलमा बर्डी प्रहार गरे। ब्याक नाइन २-अन्डर ३० मा सकाए।

३-अन्डर ६७ को नतिजामा भुवन कुमार रोक्का तेस्रो स्थानमा रहे। उनले फ्रन्ट नाइनमा २-अन्डर ३४ र ब्याक नाइनमा १-अन्डर ३३ को स्कोर दर्ज गरे। तेस्रो, सातौ, नवौं, पन्ध्रौंर अठारौं होलमा एक-एक सट बचाए। पहिलो र सत्रौं होलमा बोगी खेपे।

एमेच्योर सुन्दर राई सहित प्रोहरु युवराज भुजेल र विष्णु प्रसाद शर्माले संयुक्तरुपमा चौथो स्थान बाँडे। ५४ होलको प्रतियोगितामा २९ प्रोफेसनल २७ एमेच्योर गरी कुल ५६ गल्फरको सहभागिता रहेको छ।

कुल ८ लाख ८२ हजार रुपैयाँ पुरस्कार रहेको प्रतियोगिताको विजेताले उपाधिसँगै १ लाख ५० हजार, दोस्रोले १ लाख र तेस्रोले ७५ हजार रुपैयाँ प्राप्त गर्नेछन्। १८ होलको समाप्तीमा कट लागु हुनेछ। जहाँ २१ प्रोफेसनल गल्फरले कट बनाउने छन् । प्रोफेसनलतर्फ कट बनाएको स्कोरमा एमेच्योर गल्फरले पनि कट बनाउनेछन्।

नेपाल प्रोफेसनल गल्फर एसोसिएसनको आयोजनामा यो सिजन हुने ८ प्रतियोगितामा कुल ६७ लाख रुपैयाँ पुरस्कार रहेको छ। यसअघि भएको दुई प्रतियोगिताको उपाधि एमेच्योर गल्फरहरुले जितेका थिए।

सिजनको पहिलो प्रतियोगिता सेन्ट्रल ओपनको उपाधि एमेच्योर राहुल विके र दोस्रो प्रतियोगिताको उपाधि नेपाल नम्बर एक गल्फर सदभाव आचार्यले जितेका थिए। यो पटक भने यी दुवै खेलाडीको सहभागिता छैन। साथै चोटको कारण डिफेन्डिङ च्याम्पियन शुक्र बहादुर राईले पनि खेलेका छैनन्।