काठमाडौं (हाम्रो खेलकुद)- नेपाल अन्तर्राष्ट्रिय तेक्वान्दो महासंघ (आइटिएफ) ले सुस्मिता तामाङ र भीमबहादुर तामाङलाई वर्ष उत्कृष्ट खेलाडी अवार्ड– २०८१ बाट सम्मान गरेको छ ।

पुरुषमा भीम तथा महिलामा सुस्मिताले वर्ष उत्कृष्ट खेलाडी बुधवार अवार्डसहित नगद पुरस्कार प्राप्त गरे।
भीमले २४ औं राष्ट्रिय आइटिएफ तेक्वान्दो प्रतियोगितामा ३ स्वर्ण जितेका थिए । त्यही प्रतियोगितामा सुस्मिताले २ स्वर्ण जितेकी थिइन् ।

महासंघले आफ्नो २८ औं वार्षिकोत्सवमा वर्ष खेलाडीसहित वर्ष उत्कृष्ट प्रशिक्षक, प्रदेश संघ र जिल्ला संघलाई पनि सम्मान गरेको थियो । प्रशिक्षकमा आकाशचन्द्र घर्ती मगर, प्रदेश संघमा गण्डकी र जिल्ला संघमा गुल्मी उत्कृष्ट चुनिए ।

सोही अवसरमा गत अगष्ट १९ देखि २६ तारिखसम्म भारतमा भएको दसौं एसियाली आईटीएफ तेक्वान्दो प्रतियोगिताका स्वर्ण पदक विजेता किशोर श्रेष्ठ र राजमन्दिर श्रेष्ठ तथा रजत पदक विजेता चन्द्रबहादुर तामाङ पनि सम्मानित  भए ।

उनीहरुलाई राष्ट्रिय खेलकुद परिषद् (राखेप) उपाध्यक्ष ध्रुव आचार्य, राखेपका सदस्य अञ्जन धमला, आइटिएफका अध्यक्ष प्रवीणकुमार कार्की, महासचिव घमबहादुर थापालगायतले एक कार्यक्रमबीच सम्मान गरे ।

वार्षिकोत्सव मनाउने क्रममा यसअघि महासंघले भक्तपुरको कौशल्टारस्थित मानव सेवा आश्रममा आश्रितलाई खाना खुवाउनका साथै रक्तदान कार्यक्रम पनि गरेको थियो ।