नेपाल जुडो संघले गत बैशाखको भूकम्पमा परी ज्यान गुमाएका ३ जुडो खेलाडीका परिवारलाई सोमबार आर्थिक सहयोग हस्तान्तरण गरेको छ ।
भूकम्पका कारण जुडो खेलाडी नुवाकोटकी अनिशा डंगोल, रसुवाका नारायण तामाङ र नुवाकोटकी निलम डंगोलले ज्यान गुमाएका थिए । उनीहरुका परिवारलाई समान ३–३ लाख रुपैयाा आर्थिक सहयोग प्रदान गरियो ।
युवा तथा खेलकुद मन्त्री पुरुषोत्तम पौडेलले स्व. अनिशाकी आमा गीता, स्व. नारायणकी आमा मीनकुमारी तथा निलमकी आमा कुमारीलाई जुडो संघको तर्फबाट ३ लाख रुपैयाा बराबरको चेक हस्तान्तरण गरे ।
त्यस्तै भूकम्पकै कारण क्षतिग्रस्त भएको नुवाकोट जुडो डोजोलाई पनि १ लाख रुपैयाा आर्थिक सहयोग प्रदान गरियो । मन्त्री पौडेलले डोजोका स्वयंसेवक प्रशिक्षक एवं ओलम्पिन गंगाबहादुर डंगोललाई १ लाखको चेक प्रदान गरे ।
जुडो संघले अन्तर्राष्ट्रिय जुडो महासंघ (आईजेएफ) र अल जापान जुडो फेडेरेसनबाट प्राप्त सहयोगबाट पीडितलाई आर्थिक सहयोग प्रदान गरेको हो । आईजेएफबाट भूकम्प पीडित जुडो सम्बद्धका लागि ५० हजार अमेरिकी डलर प्राप्त भएको जुडो संघका अध्यक्ष दीपकहर्ष वज्राचार्यले जनाएका छन् । जापानबाट भूकम्प पीडित जुडो सम्बद्ध र जुडो विकासका लागि एकमुष्ट १० हजार अमेरिकी डलर सहयोग आएको थियो ।
अध्यक्ष वज्राचार्यले पहिलो चरणमा मृतक खेलाडीका परिवार र क्षतिग्रस्त एक डोजोलाई मात्र आर्थिक सहयोग वितरण गरिएको बताउदै अर्को चरणमा आंशिक एवं पूर्ण रुपमा घर भत्केका खेलाडीलगायतलाई आर्थिक सहयोग उपलब्ध गराउने जानकारी गराए । उनले जुडो संघले उपलब्ध गराएको सहयोग त्यति ठूलो नभएपनि यसले केहि हदसम्म पीडितको घाउमा मल्हम लगाउन सहयोग पुग्ने विश्वास व्यक्त गरे ।
मन्त्री पौडेलले भूकम्पले खेलकुद क्षेत्रलाई पनि ठूलो नोक्सानी पुर्याएको भन्दै अबका दिनमा नेपाली खेलकुदलाई नयाा ढंगबाट अगाडि बढाउन सरोकारवाला सबै लाग्नु पर्नेमा जोड दिए ।
