काठमाडौं (हाम्रो खेलकुद)– टेबल टेनिस खेल सामाग्री उत्पादक भारतीय कम्पनी स्ट्याग इन्टरनेसनलले नेपाली टेबल टेनिसलाई प्रायोजन गर्ने भएको छ । विगतमा अनौपचारिक रुपमा सहयोग गर्दै आएको स्ट्यागले औपचारिक रुपमा नेपाली टेबल टेनिसलाई सहयोग गर्न लागेको यो पहिलो पटक हो ।
स्ट्यागले एक बर्ष बिराएर टेबल टेनिसका आवश्यक सामाग्री उपलब्ध गराउने सम्झौता भएको अन्तर्राष्ट्रिय टेबल टेनिस महासंघको साधारण सभामा भाग लिन गएका अखिल नेपाल टेबल टेनिस संघका अध्यक्ष चतुरानन्द राजवैद्यले जानकारी दिए ।
‘हामीका श्रोत साधनको कमी छ । सानो सहयोग पनि हामीका टेबल टेनिस विकासका लागि ठूलो हुन्छ,’ राजवैद्यले टेलिफोनमार्फत हाम्रो खेलकुद डटकमलाई भने,‘यसलाई हामीले सुरुआतका रुपमा लिएका छौं । आउने दिनमा अझै बढी सहयोगको अपेक्षा राखेका छौं । यसले नेपालीको टेबल टेनिस विकासमा टेवा पुग्छ भन्ने विश्वास लिएको छु ।’
तीन बर्षका लागि भएको सम्झौता अनुसार यो बर्ष स्ट्यागले संघलाई १२ वटा टेबल टेनिस बोर्ड, सो कोर्ट टेबल टेबल र सेट्स, ६० सेट सराउन्ड्, १२ वटा स्कोर बोर्ड र १२ अम्पायर टेबल उपलब्ध गराउनेछ ।
त्यस्तै खेलाडीका लागि हरेक बर्ष ३० खेल खेल पोशाक उपलब्ध गराउनेछ । जसको एक सेटमा ३ वटा टिसर्ट, २ वटा कट्टु, १ ट्रयाकसुट, ३ जोर मोजा, १ पानीको बोटल, १ झोला रहेका छन् । त्यस्तै संघले ६० दर्जन थ्री स्टार र ६० दर्जन वान स्टार बल पनि स्ट्यागबाट प्राप्त गर्ने सम्झौतामा रहेको अध्यक्ष राजवैद्यले बताए ।
