काठमाडौं (हाम्रो खेलकुद) – म्याराथनतर्फ राष्ट्रिय कीर्तिमान तोड्दै पुष्पा भण्डारीले दोस्रो पटक बंगबन्धु शेख मुजिब ढाका म्याराथनको साफ एलिटतर्फको उपाधि जितेकी छिन् ।

शुक्रबार भएको म्याराथनमा पुष्पाले २ घण्टा ४८ मिनेट २ सेकेन्डको नयाँ राष्ट्रिय कीर्तिमानसहित निर्धारित ४२.१९५ किलोमिटर दुरी पूरा गरिन् । यसअघि पुष्पाले १३ औं दक्षिण एसियाली खेलकुदमा २ घण्टा ५० मिनेट ११ सेकेन्डको कीर्तिमानका साथ रजत पदक हासिल गरेकी थिइन् ।

शुक्रबार ढाकामा पुष्पाले पहिलो स्थान हासिल गर्दा नेपालकै विन्द्रा धानके श्रेष्ठले तेस्रो स्थान हासिल गरिन् । श्रीलंकाकी सुजनी परेरा दोस्रो भइन् । परेरा पुष्पाभन्दा २० सेकेन्ड पछि रहेकी थिइन् । विन्द्राले २ घण्टा ५२ मिनेटमा दुरी पूरा गरिन् ।

पुष्पाले यसअघि म्याराथनको सन् २०२१ संस्करणमा साफ एलिटतर्फ स्वर्ण पदक जितेकी थिइन् । सन् २०२२ को संस्करणमा भने उनी कास्य पदकमा सिमित भएकी थिइन् । यसपटक पुरुष म्याराथनमा सन्तोष विक्रम विष्ट चौथो र किरण बोगटी सातौं भए । यस विधामा कर्ण खड्काले पनि प्रतिस्पर्धा गरेका थिए ।

यस्तै पुरुष हाफ म्याराथनमा गोपीचन्द्र पार्कीले १ घण्टा ६ मिनेट ४४ सेकेन्डको समय निकाल्दै तेस्रो स्थान हासिल गरे । सन्तोष नाथ योगी १ घण्टा १० मिनेट ५४ सेकेन्ड समय निकाल्दै आठौं भए ।

महिला हाफ म्याराथनमा सन्तोषी श्रेष्ठ १ घण्टा १५ मिनेट १७ सेकेन्डसाथ चौथो भइन् । राजपुर पछाईले १ घण्टा १६ मिनेट ४८ सेकेन्ड तथा रेखा विष्टले १ घण्टा २७ मिनेट ५५ सेकेन्डमा हाफ म्याराथन पूरा गरे ।