काठमाडौं (हाम्रो खेलकुद) – कर्णाली प्रदेशको राजधानी सुर्खेतको वीरेन्द्रनगरमा अर्को महिना हाफ म्याराथन आयोजना हुने भएको छ ।

रेस नेपालको आयोजना एवं क्रियटिभ गन्ज मिडिया एण्ड इभेन्ट म्यानेजमेन्टको व्यवस्थापनमा कर्णाली हाफ म्याराथन वैशाख २९ गते हुने बताइएको छ।

कर्णालीमा प्रदेशमा २०८१ मंसिर पहिलो साता हुने दशौं बृहत राष्ट्रिय खेलकुदलाई प्रवद्र्धन गर्ने उद्देश्यका साथ हाफ म्याराथन आरम्भ गर्न लागिएको जनाइएको छ।

कर्णाली हाफ म्याराथनमा २१.०९७५ किमी पुरुष तथा महिला , ५ किलोमिटर स्कुल स्तरीय छात्र एवं छात्रा दौड, ५ किलोमिटर ह्वीलचेयर, ५ किलोमिटर कर्पोरेट रन र ४२१.९५ मिटर किड्स रन समावेश गरिएको छ । म्याराथनका क्रममा खेलकुदसँग शिक्षा, स्वास्थ्य र पर्यटनको सम्बन्धका बिषयमा बहस छलफल समेत गरिनेछ बताइएको छ ।

नौ बर्षदेखि नेपालगन्ज म्याराथन आयोजना एवं व्यवस्थापन गर्दै आएको क्रियटिभ गन्ज मिडिया एण्ड इभेन्ट म्यानेजमेन्टले दौड संस्कृतिको प्रवद्र्धन गर्दै प्रतिभाशाली खेलाडी खोज अभियान अन्तर्गत कर्णाली हाफ म्याराथन गर्न लागेको नेपालगञ्ज म्याराथनका अध्यक्ष टीएस ठकुरीले प्रेस विज्ञप्तिमार्फत जानकारी दिएका छन्।

धारा नेपालगन्ज म्याराथनले आफ्नो यात्राको एक दशक पूरा हुने पुर्व सन्ध्यामा दौडसम्बन्धि विविध नयाँ सोंच र कार्यक्रमको तयारी गरिरहेको पनि बताइएको छ ।
कर्णाली प्रदेश खेलकुद विकास परिषदसँगको आर्थिक सहयोग साझेदारी तथा अन्य स्थानीय पालिका एवं नीजि क्षेत्रको सहयोगमा कर्णाली हाफ म्याराथन हुन लागेको र यसको रुट तथा नगद पुरस्कारका सम्बन्धमा चाँडै जानकारी गराइने जनाइएको छ।