पोखरा (हाम्रो खेलकुद)- केन्याका विल्सन चेरियोटले १९औं सफल पोखरा अन्तर्राष्ट्रिय म्याराथनको उपाधि जितेका छन्।

पोखरा रंगशालाबाट सुरु भएको म्याराथन सहरका विभिन्न भाग हुँदै हल्लन चोकमा पुगेर टुंगिएको थियो। उनलाई सुरूवात देखि नै केन्या कै जुलियस मुरियुकी वाहहोमले कडा चुनौती दिएका थिए।

जहाँ मिलिसेकेन्डमा जुलियसलाई माथ दिंदै विल्सन च्याम्पियन बने। निर्धारित ४२ दशमलव १९५ किलोमिटरको दुरी २ घण्टा १७ मिनेट २४ सेकेन्डमा पूरा गर्दै विल्सन पहिलो भए।

जुलियस २ घण्टा १७ मिनेट २६ सेकेन्डको टाइमिङमा दोस्रो स्थानमा रहे। विदेशी खेलाडीको वर्चस्व रहेको म्याराथनमा केन्याकै ओनेसमस गीताउ तेस्रो भए। उनले २ घण्टा १८ मिनेट ५१ सेकेन्डको टाइमिङ निकाले। शीर्ष ३ खेलाडीले गत वर्षको कोर्स रेकर्डलाई‌ तोडेका‌ छन्।

१३औं दक्षिण एसियाली खेलकुद (साग) का स्वर्ण विजेता नेपालका किरण सिंह बोगटी चौथो भए। उनले २ घण्टा ३८ मिनेट २२ सेकेन्डमा दुरी तय गरे। उनी विजेता विल्सन भन्दा २० मिनेट भन्दा बढीको टाइमिङले पछि रहे।

म्याराथनमा पहिलोले ५ लाख दोस्रोले ३ लाख र तेस्रोले २ लाख रुपैयाँ पुरस्कार हात पारे।

सन्तोषीलाई‌ हाफ म्याराथन उपाधि

महिला हाफ म्याराथनतर्फ नेपालकी स्टार धाविका १३ औं सागकी स्वर्ण पदक विजेता सन्तोषी श्रेष्ठ पहिलो भइन्। उनले १ घण्टा २० मिनेट ०३ सेकेन्डमा दौड पूरा गरिन्।

स्वारोन जेनेटिक दोस्रो भइन्। उनले १ घण्टा २१ मिनेट ०७ सेकेन्डमा निर्धारित दूरी तय गरिन्। पुष्पा भण्डारी तेस्रो भइन्। यो क्रममा उनले १ घण्टा २३ मिनेट ०८ सेकेन्डमा दौड सकाइन्।

पुरुष हाफ म्याराथनको उपाधि सन्तोष विक्रम बिष्टले जिते। उनले १ घण्टा ०९ मिनेट ०७ सेकेन्डमा दूरी तय गरे। १ घण्टा ०९ मिनेट ५६ सेकेन्डमा दौड पुरा गरेका गजेन्द्र राई दोस्रो भए। इमानुयल किपतारबेइ तेस्रो भए। उनले १ घण्टा १० मिनेट ०२ सेकेन्डको टाइमिङ निकाले।

यसैगरी १० किलोमिटर पुरूषमा नागेश्वर अहिर पहिलो भए। राजेन्द्र तामाङ दोस्रो र बादल कार्की तेस्रो स्थानमा रहे। महिला १० किलोमिटरतर्फ समिक्षा पहारी पहिलो हुँदा मधुरीमा रोक्का दोस्रो र रक्षा तिलाजी तेस्रो भए।

५ किलोमिटर पुरुषमा सगुन लामिछाने पहिलो भए। सुजन नेपाली दोस्रो र समिर बरुवाल तेस्रो भए। महिलातर्फ सोफी जिसी पहिलो भइन्। अनिषा केसीले दोस्रो र प्रिन्सी भण्डारीले तेस्रो स्थानमा दौड सकाए।

नेपाल भूतपूर्व खेलाडी मंचद्वारा आयोजित म्याराथनमा कुल पुरस्कार २१ लाख ३४ हजार रुपैयाँ रहेको छ।
म्याराथनमा नेपाल, भारत, चीन, अमेरिका, केन्यालगायत २१ देशका ८० विदेशीसहित १ सय ५० धावकले  दाबेदारी प्रस्तुत गरेका थिए।

हाफ म्याराथनमा महिलातर्फ १० देशका ४०, पुरुषतर्फ ११ विदेशीसहित १ सय १० धावकले सहभागीता जनाए। १० किमी दौड पुरुषमा ११ देशका २ सय ११ र महिलामा ११ विदेशीसहित १ सय ९ ले प्रतिस्पर्धा गरे।