हिमाल खरेल, भद्रपुर

झापा जिल्लास्तरीय १५ औँ राष्ट्रपति रनिङ सिल्ड खेलकुद प्रतियोगिताको दोस्रो दिन अर्जुनधारा पहिलो स्थानमा उक्लिएको छ ।

भद्रपुरस्थित मेची रंगशालामा सञ्चालन भइरहेको प्रतियोगिताअन्तर्गत दोस्रो दिन शनिवार खेलहरु सकिँदा एथलेटिक्सतर्फ अर्जुनधारा नगरपालिका अगाडि रहेको छ ।

एथलेटिक्सको अधिकांश नतिजा सार्वजनिक हुँदा अर्जुनधारा ८ पदकसहित अग्रस्थानमा रहेको एथलेटिक्स प्रशिक्षक गोपाल यादवले जानकारी दिए ।

प्रतियोगितामा एथ्लेटिक्स विधाअन्तर्गत दौड, सटपुट थ्रो, ज्याभलिन थ्रो, लङजम्प र ट्रिपलजम्पका खेल समावेश छन् ।

एथलेटिक्सतर्फ मेचीनगर नगरपालिका र दमक नगरपालिकाले समान ७ पदक प्राप्त गरेका छन् भने कमल गाउँपालिकाले ६ वटा पदक हासिल गरेको छ ।

त्यस्तै, शिवसताक्षीले ५, बिर्तामोड र बाह्रदशीले समान ४, भद्रपुर र कनकाईले समान ३ तथा कचनकवल, गौरीगञ्ज, हल्दिबारी र झापा गाउाँपलिकाले समान २ पदक जितेका छन् । गौरादह नगरपालिका र बुद्धशान्ति गाउँपालिका एथलेटिक्समा पदकविहीन छन् ।

प्रतियोगितामा भलिबल (छात्र/छात्रा), कबड्डी (छात्र/छात्रा), कराते (छात्र/छात्रा), तेक्वान्दो (छात्र/छात्रा) र उसु (छात्र/छात्रा) का खेलहरु पनि सञ्चालन भइरहेको आयोजक झापा जिल्ला खेलकुद विकास समितिका अध्यक्ष भेषराज भण्डारी प्रशान्तले जानकारी दिए ।

प्रतियोगितामा झापाका १५ वटै स्थानीय तहको सहभागिता रहेको छ । प्रतियोगिता आइतबारसम्म सञ्चालन हुने र सबै विधाको अन्तिम नतिजा आइतबार नै सार्वजनिक हुने समितिका प्रवक्ता जगन कार्की ‘दुर्वासा’ले जानकारी दिए ।