पोखरा (हाम्रो खेलकुद)- नेपाल भूतपूर्व खेलाडी मञ्चको आयोजनामा शनिवार पोखराका आमा समूहको दौड सम्पन्न भएको छ । 

रजत महोत्सवको अवसरमा १२ महिना १२ कार्यक्रमअन्तर्गत मञ्चले पहिलो पटक आमा समूहको दौड आयोजना गरेको हो । त्यस संगै नियमित मासिक दौड अन्तर्गत हुँदै आएको छात्र/छात्रा दौड समेत सम्पन्न भएको छ ।

चुलोचौको र खेतबारीमा सीमित रहँदै आएका महिलालाई खेलकुदमा सचेतना बढाउन विशेष ‘आमा समूह दौड’ आयोजना गरेको मञ्चका पूर्व अध्यक्ष एवं रेश डाइरेक्टर तेज बहादुर गुरूङले बताए ।

३ किलोमिटर दूरीको उक्त दौडमा ५ सयभन्दा बढी महिलाहरूले सहभागिता जनाएका थिए ।

पोखरा रंगशालामा आयोजित कार्यक्रमको उद्घाटन जिल्ला प्रशासन कार्यालय कास्कीकी प्रमुख जिल्ला अधिकारी रुद्रादेवी शर्माले गरेकी थिइन् । उनले महिलाहरूको मैदानमै सक्रियता समाज रुपान्तरणको आधार बन्ने बताइन् ।

आमा समूह दौडमा हरि कुमारी श्रेष्ठ पहिलो, विष्णु कुमारी ठकुरी दोस्रो,  रिया गुरूङ तेस्रो भइन् । सूर्यकला थापा चौथो,  राधिका थापा पाँचौं, झगदेबी बुढा छैटौं ,मधु देवकोटा सातौं, सिता तामाङ आठौं, सरिता जिशी नवौं र विमला केसी दसौं भइन् ।

त्यस्तै छात्र ५ किमि छात्रतर्फ छोरेपाटन माविका आयुष सुनार १७ मिनेट ३१ सेकेन्डमा दौड पूरा गर्दै पहिलो भए । बराह माविका शुस्मन ढुङ्गाना (१७मिनेट ४१ सेकेन्ड ) दोस्रो र माछापुच्छ्रे माविका राजिव बास्तोलाले ( १८ मिनेट ३३ सेकेन्ड) तेस्रो भए ।

त्यस्तै छात्रातर्फ एन्जिला जिटी पहिलो भइन् । मेघराज माविकी उनले आफ्नो दौड २१ मिनेट ०२ सेकेन्डमा पूरा गरिन् ।

गौरीशंकर मावीकी कविता मगरले (२१ मिनेट ३८ सेकेण्ड) दोस्रो र महेन्द्र माविकी सोनिया नेपालीले २१ मिनेट ५२ सेकेन्ड) तेस्रो भइन् ।