काठमाडौं (हाम्रो खेलकुद)– एथलेटिक्सका हरिकुमार रिमालले रियो ओलम्पिकको ५ हजार मिटर दौडमा कमजोर प्रदर्शन गरेका छन् । राष्ट्रिय कीर्तिमानको लक्ष्यसहित रियो ओलम्पिक पुगेका उनी आफ्नै उत्कृष्ट समयलाई पनि भेट्टाउन असफल रहे । बुधबार साँझ हिटमा दौडेका हरिले १४ मिनेट ५४.४२ सेकेन्ड समय निकालेका थिए । त्रिभुवन आर्मी क्लबका उनको उत्कृष्ट समय १४ मिनेट ३२.१८ सेकेन्डको छ ।

१४ मिनेट ०१.१९ सेकेन्डको राष्ट्रिय कीर्तिमान छ आर्मीकै राजेन्द्र भण्डारीको नाममा छ । उनले सन् २००४ एथेन्स ओलम्पिकमा उक्त कीर्तिमान बनाएका थिए ।
हरिले फागुनमा भारतमा भएको १२ औं दक्षिण एसियाली खेलकुद (साग) ५ हजार मिटरमा कास्य पदक जितेका थिए । सागमा एथलेटिक्समा पदक जित्ने उनी एक्लो नेपाली खेलाडी हुन् । त्यहि प्रदर्शनले उनलाई रियो सम्म पुर्याएको थियो, तर उनी त्यहाँ आफ्नै उच्च प्रदर्शन गर्नबाट चुके ।
हरिले राष्ट्रिय कीर्तिमानको लक्ष्य बनाएर दौडदा त्यस्तो नतिजा आएको बताएका छन् । उनले भने, ‘व्यक्तिगत उत्कृष्ट तिर मैले ध्यान दिइन , खाली राष्ट्रिय कीर्तिमान मात्रै थियो । ४\५ लेनपछि मैले गतिलाई कायम गर्न सकिन । कोशिस गरे, तर सकिएन ।’
हरिका प्रशिक्षक पुष्पराज ओझाले आफ्नै गतिमा दौडेको भए व्यक्तिगत उत्कृष्ट समय निक्लने विश्वास व्यक्त गरे । ओलम्पियन ओझाले थपे,‘तर उनले राष्ट्रिय कीर्तिमानमा बढी केन्द्रित भए । इन्डुरेसन पुगेन । विश्वका उत्कृष्ट धावकहरुको गतिमा हामी दौडन सक्दैनौं ।’