रियो दि जेनेरियो (एजेन्सी) – जमैकन धावन उसेन बोल्टले रियो ओलम्पिकमा २ सय मिटर दौडमा पनि स्वर्ण पदक जितेका छन् । शुक्रबार बिहानको यो सफलतासँगै उनले जारी ओलम्पिकमा तीन स्वर्ण पदक जित्ने सम्भावनालाई समेत जीवित राखेका छन् ।
२९ बर्षे बोल्टले १९.७८ सेकेन्डको समय निकाल्दै स्वर्ण पदक जितेका हुन् । क्यानडाका आन्द्रे डी ग्रासेले रजत र फ्रान्सका क्रिस्टिोफे लिमेट्रेले कास्य पदक जिते ।
बेलायतका एडम गिमिलीले लिमेट्रेसँगै दौड पुरा गरेपनि फोटो फिनिसमा पछि परेर पहिलो ओलम्पिक पदक जित्नबाट चुके ।
बोल्टले रियो ओलम्पिकमा १ सय मिटरमा यसअघि नै स्वर्ण जितिसकेका छन् । अब उनले शनिबार जमैकन टोलीसँग ४ गुना १ सय मिटर रिलेमा प्रतिस्पर्धा गर्नेछन् ।
बोल्टले सन् २००८ को बेजिङ ओलम्पिक र २०१२ को लन्डन ओलम्पिकमा १ सय ,२ सय र ४ गुना १ सय मिटर रिले तीनै वटा इभेन्टमा स्वर्ण पदक जितेका थिए ।
