काठमाडौं (हाम्रो खेलकुद) – आयोजक लालीगुराँस नेसनल एकेडेमी ‘ए’ दोश्रो लालीगुराँस अन्तरविद्यालय जुनियर ब्वाइज बास्केटबल प्रतियोगितामा मंगलबार क्वाटरफाइनलमा प्रवेश गरेको छ ।
लालीगुराँस ‘ए’ ले राइजिङ स्टारलाई १४–८ ले पराजित गर्दै क्वाटरफाइनल पुग्ने पहिलो टोली बन्यो । लगातार तीन खेल जितेको लालीगुराँस ‘ए’ समूह ‘ए’ को विजेताका रुपमा क्वाटरफाइनल पुगेको हो । लालीगुराँस ‘ए’ को जितमा विराज तामाङले ८ अंक योगदान गरे ।
अन्य लिग खेलमा पिपुल्स एकेडेमी, पुष्पकुञ्ज, नेरिक एकेडेमी, एन्जल्स हर्ट र भ्याली पब्लिकले जित आत्मासात् गरे ।
पिपुल्सले हिमालयनलाई २५–१८ ले हरायो । पिपुल्सका विजय घले सानदार प्रदर्शन गर्दै २२ अंक जोडे । एलन गुरुङको १४ अंक सहयोगमा पुष्पकुञ्जले राइजिङ स्टारलाई २०–५ ले पन्छायो । नेरिकले ज्ञान सिन्धुलाई २४–१५ ले निराश पार्यो । नेरिकका सुजन बस्नेतले ८ स्कोर गरे ।
एन्जल्स हर्टले बसुन्धारा नेसनल एकेडेमी (बीएनए) लाई १२–८ ले पाखा लगायो । एन्जल्स हर्टका प्रतीक गौलीले ४ अंक बटुले । आयोजक लालीगुराँस ‘बी’ विरुद्धको खेलमा भ्याली पब्लिक २०–१० ले विजयी भयो । भ्याली पब्लिकका रोहन श्रेष्ठले १० स्कोर गरे ।
