काठमाडौं (हाम्रो खेलकुद) – टिआइए अन्तर विद्यालय बास्केटबल प्रतियोगिताको १२ औं संस्करण शुक्रबार सुरु हुँदा अलग अलग विधामा ३४ टोलीले प्रतिस्पर्धा गर्ने भएका छन् । हात्तिगौंडा बाँसबारीस्थित ठुङरम इन्टरनेशनल एकेडेमी (टिआइए) को आयोजनामा एकेडेमीकै कोर्टमा सिनियर ब्वाइज, गल्र्स र स्टाफ विधामा प्रतिस्पर्धा हुने टीआइएका अतिरिक्त क्रियाकलाप संयोजक सन्तोष भट्टराईले जानकारी दिए ।
प्रतियोगितामा सिनियर गल्र्समा १६ विद्यालयको सहभागिता रहनेछ । सहभागी टोलीलाई ४ समूहमा विभाजन गरिएको छ । ब्वाइजतर्फ सहभागी १२ टोलीलाई पनि ४ समूहमा विभाजन गरिएको बताइएको छ ।
लिग कम नकआउटका आधारमा हुने प्रतियोगिता हरेक समूहका शीर्ष दुई टोली क्वार्टरफाइनलमा पुग्नेछन् । स्टाफतर्फ सहभागी ६ टिमलाई २ समूहमा विभाजन गरिएको छ । राष्ट्रिय रेफ्रीले गर्ने प्रतियोगितामा झन्डै २ लाख रुपैयाँ खर्च हुने टिआइएकी प्रिन्सिपल नीरा प्रधानले जानकारी दिइन । विद्यालय व्यवस्थापन समितिका अध्यक्ष कर्माछिरिङ शेर्पाले शुक्रबार प्रतियोगिताको उद्घाटन गर्नेछन् ।
