काठमाडौं (हाम्रो खेलकुद)– भ्याली पब्लिकको गल्र्स र ब्वाइज दुवै टोली १२ औं टिआइए अन्तरविद्यायल बास्केटबल प्रतियोगिताको सेमिफाइनलमा पुगेको छ । ब्वाइजको सेमिफाइनलमा आयोजक ठूङरम इन्टरनेसल एकेडेमी (टिआइए) को सामना गर्ने भ्यालि पब्लिकले गल्र्सतर्फ होली भिजनसँग प्रतिस्पर्धा गर्नेछ ।
ब्वाइजतर्फको अर्को सेमिफाइनलमा एचएचसिए र स्काई लार्कबीच प्रतिस्पर्धा हुनेछ । गल्र्सको सेमिफाइनलमा चान्दबाग र बाबाले एकअर्काको सामना गर्नेछन् । मंगलबार भएको हात्तिगौडास्थित टिआइएको कोर्टमा भएको क्वार्टरफाइनलमा होली भिजनले टिआइएलाई २२–१८ ले, चान्दबागले इडन ब्रिजलाई १५–१३ ले र बाबाले लोयल्टीलाई १८ –८ ले हरायो । प्रन्जिता कार्कीको १० स्कोरको मद्दतमा भ्याली पब्लिकले भद्रकालीको चुनौति २७–१५ ले समाप्त पारेको थियो ।
ब्वाइजतर्फ आयोजक टिआइएले एन्जल हार्टबाट वाकओभर पायो भने स्काई लार्कले ग्रिनल्यान्डलाई ४५–४३ को झिनो अन्तरले हरायो । तेन्जिङ राईको १५ स्कोरको मद्दतमा एचएचसिएले ज्ञाननिकेतनलाई ४५–२७ तथा राहुल विकेको १० स्कोरमा भ्याली पब्लिकले बुद्ध एकेडमीलाई २५–१३ ले पराजित गर्यो ।
