काठमाडौं (हाम्रो खेलकुद)– त्रिभुवन आर्मी क्लब राष्ट्रिय बास्केटबल लिग (एनबिएल) अंक तालिकाको दोस्रो स्थानमा उक्लेको छ । बुढानिलकण्ठ बास्केटबल क्लबलाई सोमबार १०४–७७ ले हराउँदै आर्मी दोस्रो स्थानमा उक्लेको हो ।

अन्तिम २ खेल बाँकी रहँदा आर्मीको ९ अंक पुगेको छ । १० अंकसहित टाइम्स इन्टरनेसनल कलेज शीर्षस्थानमा छ ।त्रिपुरेश्वरस्थित राष्ट्रिय खेलकुद परिषद्को कभर्ड हलमा आर्मीले खेलको सुरुवातबाट अग्रता बनाएको थियो ।

पहिलो क्वार्टरमा २५–२१ को अग्रता लिएको आर्मीले त्यसपछि दोस्रोको समाप्तीमा ५६–३० र तेस्रोको अन्त्यमा ८१–५२ ले अन्तर बढाएको थियो । २५ स्कोर गरेका आर्मीका निश्चिल महर्जनले २५ स्कोर गरे ।

अर्को खेलमा हाउड्स एकेडेमीले विशाल मिलन केन्द्रलाई ९२–७० ले हरायो । पहिलो क्वार्टरमा २१–२४ ले पछि परेको हड्सनले दोस्रो क्वार्टरको समाप्तीमा ३५–३३ को अग्रता बनायो । त्यसलाई निरन्तरता दिने क्रममा तेस्रो क्वार्टरको समाप्तीमा पुग्दा हाउड्सले ६१–४५ को अग्रता कायम गर्यो । १८ स्कोर गरेका हाउड्सका भाग्यान्स गुलाटी म्यान अफ दी म्याच बने ।

समान ६ अंक रहेका हाउड्स छैटौं, गोल्डेनगेट इन्टरनेसनल कलेज सातौं र विशाल मिलन केन्द्र आठौं स्थानमा छ । समान ८ अंक जोडेका कीर्तिपुर बास्केटबल तेस्रो, रोयल स्पोर्टस सेन्टर चौथो र ७ अंकसहित बुढानिलकण्ठ बास्केबल क्लब पाँचौं स्थानमा छ ।
नेपाल बास्केटबल संघ र डिजिफ्लाइको सहकार्यमा हुने सिंगल राउन्ड रोबिनको एनबिएलमा ८ टोली सहभागी छन् । असोज २७ गतेसम्म चल्ने प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।