हिमाल खरेल, बिर्तामोड

झापामा पहिलोपल्ट आयोजना गरिएको राष्ट्रियस्तरको दुई दिने झापा थ्री एक्स थ्री बास्केटबल प्रतियोगिताको उपाधि काठमाडौंको टाइम्स क्लबले जितेको छ ।

हिजो राति अबेर भएको फाइनल खेलमा विभागीय टोली त्रिभुवन आर्मी क्लबमाथि कठिन जित निकाल्दै टाइम्स च्याम्पियन बनेको हो । निर्धारित १० मिनेटको खेलमा टाइम्सले १९–१८ स्कोरको जित निकाल्दै उपाधि जितेको हो ।

जितसँगै टाइम्सले नगद २ लाख र आकर्षक ट्रफी प्राप्त गर्‍यो । उपविजेता बनेको आर्मीले नगद १ लाख रुपैयाँ प्राप्त गर्यो । टाइम्सकै श्रेयसबहादुर शाह बेस्ट प्लेयर बने ।

आर्मीले सेमिफाइनलमा झापा बास्केटबल एसोसिएसनलाई २१–६ को फराकिलो स्कोरले पराजित गरेको थियो । त्यस्तै, टाइम्सले धरान सुनसरीको इमोर्टलसलाई १९–१४ स्कोरमा रोक्दै उपाधिनजिक पुगेको थियो ।

झापा जिल्ला बास्केटबल संघ र बिर्तामोड नगर खेलकुद विकास समितिले आयोजना गरेको प्रतियोगितामा देशभरका १६ वटा टोलीको सहभागिता रहेको थियो ।

विजेता तथा उपविजेता टिमलाई प्रदेश सरकारका खानेपानी, सिँचाइ तथा ऊर्जामन्त्री एकराज कार्की, बिर्तामोड नगरपालिकाका उपप्रमुख नगेन्द्रप्रसाद संग्रौला, बास्केटबल संघका अध्यक्ष प्रकाश लिङदेन, नगर खेलकुद विकास समितिका अध्यक्ष विकास गिरीलगायतले पुरस्कार वितरण गरेका थिए ।